Երգով ու պարով երևանցիներին հիշեցրին հայ ազգային մշակույթի մասին (լուսանկարներ, տեսանյութեր)

Արամ Խաչատրյանի արձանի մոտից մեկնարկեց «Հայֆոն» երիտասարդական շարժման նախաձեռնած Հայ ազգային երգ ու պարի քայլերգը։ Երիտասարդները երգելով քայլեցին Հյուսիսային պողոտայով, նրանք պետք է անցնեն Հանրապետության հրապարակով և «Մոսկվա» կինոթատրոնի մոտ պարեն։ Հետո երգելով երթը կբարձրանա դեպի մետրոյի «Երիտասարդական» կայարան, որտեղ «Հայֆոնը» նորից կպարի։

Ինչպես Tert.am–ի հետ զրույցում նշեց շարժման անդամ Նունե Հայրապետյանը, քայլերթի նպատակն է հայ երիտասարդներին հիշեցնել հայ ազգային մշակույթի մասին։ Ըստ նրա՝ այսօր ռադիոյով և հեռուսատեսությամբ օտարազգի մշակույթի կողքին չի ներկայացվում հայկական այլընտրանքը, չկան հայկական մշակութային պարբերական հաղորդաշարեր։

Երիտասարդներն այդ հարցով դիմել են մշակույթի նախարարությանը։ Նամակին ի պատասխան՝ Հասմիկ Պողոսյանը նրանց հանդիպման է հրավիրել։ Ինչպես պատմեց շարժման անդամ Հարություն Ծատրյանը, նախարարը կիսել է երիտասադների մտահոգությունը, սակայն հայտնել, որ նախարարությունն անզոր է այդ հարցում օգնել երիտասարդներին։ Ըստ Ծատրյանի՝ մշակույթի ոլորտը ևս կոմերցիոն ոլորտ է, և իրենք լծակներ չունեն։