Պետությունը բավարար միջոցներ չի հատկացնում պատմամշակութային ժառանգության պահպանմանը. մշակութաբան (տեսանյութ)

Մշակույթի նախարարության պատմամշակութային ժառանգության գիտահետազոտական ինստիտուտի տնօրեն Հակոբ Սիմոնյանը լրագրողների հետ այսօրվա ասուլիսում տեսակետ հնչեցրեց, որ իր պատմամշակութային ժառանգության ծավալով Հայաստանն առաջատար դիրք է զբաղեցնում ամբողջ աշխարհում. «Եթե հաշվի առնենք այն փաստը, որ պաշտոնապես հաշվառված հուշարձանների թիվն առաջիկայում կազմելու է 26.000, պետք է ասել, որ փաստորեն Հայաստանի յուրաքանչյուր մեկ կիլոմետր քառակուսի տարածքին բաժին է ընկնում մեկ հուշարձան»,- նշեց մշակութաբանը: Մինչդեռ, նրա բնորոշմամբ, օրինակ, տարածքով Հայաստանին գերազանցող Մոլդովայում կամ Բելառուսում հուշարձանների թիվը գրեթե 3-4 անգամ զիջում է Հայաստանում վկայագրվածների թվին:

«Պետք է ասել, որ չնայած վիթխարի ժառանգությանը` դրա պահպանման համար պետության կողմից տրամադրվող ֆինանսական միջոցներն անհամեմատ քիչ են`տարեկան կտրվածքով շուրջ մեկ միլիոն դոլար: Այնինչ հարևան Վրաստանում նույն նպատակի համար պետությունը հատկացնում է շուրջ 9 միլիոն դոլար»,- ցավով արձանագրեց Հակոբ Սիմոնյանը:

Անդրադառնալով Երևանի ճարտարապետա-քաղաքաշինական ներկայիս վիճակին՝ մասնագետը պարզաբանեց, որ դեռևս 1993 թ.-ին ինքը մասնակցել է Երևանի պատմամշակութային հիմնավորումը ներառող մի փաստաթղթի մշակման աշխատանքներին, ինչի արդյունքում որոշում էր կայացվել մայրաքաղաքի բոլոր քաղաքաշինական ծրագրերն իրականացնել ըստ նշյալ հայեցակարգի: Բանախոսը տեղեկացրեց, որ ընդունված փաստաթղթի համաձայն`Երևանի ամբողջ կենտրոնը համարվել է արգելոց-հուշարձանային միջավայր: «Ցավոք, Հայաստանի նախորդ իշխանությունները չեղյալ համարեցին փաստաթուղթը, ինչի հետևանքով մենք կորցրեցինք հին Երևանը»,- ասաց մշակութաբանը: