Դեղին մամուլին կաշառել են Ջիգարխանյանից վրեժ լուծելու համա՞ր

Հայազգի հանրաճանաչ դերասան, Մոսկվայի դրամատիկական թատրոնի գեղարվեստական ղեկավար Արմեն Ջիգարխանյանի անձնական կյանքի շուրջ սկանդալը շարունակվում է։ Ինչպես ավելի վաղ հայտնել էինք, ռուսական լրատվամիջոցները վերջերս տեղեկություն էին տարածել, թե Ջիգարխանյանը սիրավեպ է սկսել երիտասարդ դերասանուհի Վիտալինա Ցիմբալյուկ Ռոմանովսկայայի հետ, և այժմ այդ աղջիկն է Ջիգարխանյանին խորհուրդ տալիս՝ ինչ անել և ինչպես։ Հաղորդվում է, որ Վիտալինայի պատճառով թատրոնն արդեն մի քանի դերասան է լքել։

Որոշ ռուսական լրատվամիջոցներն էլ հաղորդում են, որ սկանդալային այդ լուրերը սաստիկ ընկճել են դերասանին և այդ ամենի պատճառով Ջիգարխանյանի առողջական վիճակը կտրուկ վատացել է, ինչի հետևանքով վերջերս նա հիվանդանոցում է հայտնվել։

Օրեր առաջ Sobesednik.ru կայքի հետ զրույցում Ջիգարխանյանը կրկին անդրադարձել է այդ լուրերին և ասել. «Ես ուզում եմ ասել, որ այդ ամենը փուչ բաներ են,  այլ խոսք չեմ գտնում ասելու։ Ես Վիտալինային գնահատում եմ որպես պրոֆեսիոնալի և թքած ունեմ այդ  լուրերի վրա։ Ես 50 տարի է, ինչ թատրոնում եմ, նման բաներ տեսել եմ։ Այլ դերասանների հետ կապված նմանատիպ պատմություններ ևս եղել են, և բոլոր դեպքերում նույն  խոսքերն են հնչել՝ «Թող նա (աղջիկը) լքի թատրոնը»։ Իսկ դուք ովքե՞ր եք՝ կիսագրագետ, անտաղանդ և որպես կանոն, ճարպակալած հիմարներ։ Ես դրանց բոլորին ազգանունով ճանաչում եմ, և ողջ ճշմարտությունը նրանց դեմքին ասել եմ։ Ես նրանց  դուրս եմ շպրտել, նրանց դուրը դա չի եկել, և նրանք գումար են հավաքել՝ դեղին մամուլին «կաշառելու» և ինձնից վրեժ լուծելու համար»,–ասել է Ջիգարխանյանը։