Րաֆֆի Հովհաննիսյանը վերսկսում է հավաքները՝ միանալով ազատամարտիկներին (լուսանկարներ, տեսանյութ, տարբերակ 7)

Ազատության հրապարակում քիչ առաջ մեկնարկել է «Ժառանգություն» կուսակցության առաջնորդ Րաֆֆի Հովհաննիսյանի հրավիրած հանրային ժողովը, որտեղ ներկայացվելու է Անկախության օրակարգը:

Ի պատասխան Tert.am –ի հարցի, թե ո՞րն է Անկախության օրակարգը, կուսակցության փոխնախագահ Արմեն Մարտիրոսյանը շատ լակոնիկ պատասխանեց.«Կգաք ու կլսեք՝ որն է անկախության օրակարգը»:

Րաֆֆի Հովհաննիսյանի ֆեյսբուքյան էջում ժողովի մասին ազդարարող կարճ տեսանյութ էր տեղադրվել, որտեղ ասվում է, որ այսօր Ազատության հրապարակում մշակվելու է «մեր միասնական օրակարգը»։

Հանրային ժողովը կվարի Րաֆֆի Հովհաննիսյանը, իսկ ժողովին կհաջորդի տոնական համերգ՝ «Ռեինկարնացիա», անկախության հռչակագրի օր, օգոստոսի 23»:

19.09 


Նախքան կսկսվեր համերգը Րաֆֆի Հովհաննիսյանը, ձեռքին սև թղթապանակ, բարձրացավ աստիճաններով և մոտենալով երաժիշտներին, ձեռքով բարևեց նրանց:

 

19.50

Ամեն ինչ փոխվելու է այս տարվա մեջ. Րաֆֆի Հովհաննիսյան

Րաֆֆի Հովհաննիսյանն իր ելույթում ասաց, որ ներքին և արտաքին մարտահրավերն են իրենց անկախության օրակարգը՝ ավտոբուսներով և ինքնաթիռներով արտագաղթող ժողովուրդ, Թուրքիայի նախագահ Աբդուլահ Գյուլ, որը ցանկանում է անցկացնել թյուրքալեզու հավաք, 80 /20 –ի դիմաց «ոչընտիր» կամ «անընտիր» իշխանություն, որն ուզում է «թագավորել այդ կեղծիքին համապատասխան»:

«Ժառանգություն» կուսակցության առաջնորդի բառապաշարում այսօր հնչում էին բառեր, որոնք հատուկ էին նախագահական ընտրություններից հետո հետընտրական Հայաստանին:

«Եվ այն ռիսկը ունեն, որ Հայաստանի և Արցախի միավորման կողմնակիցներին ասում է դավաճան»,- հայտարարեց Րաֆֆի Հովհաննիսյանը՝ հիշեցնելով, որ հենց այդ հրապարակում երդում է տրվել:

«Իմ կնոջը, երեխաներին, գործընկերներից ոմանց ցույց տվեցին Բաղրամյանի ասֆալտի հոտը և ասֆալտը, և ոստիկանապետը որոշեց ժողովրդի կողմից ընտրված քաղաքացու հետ քայլել և աղոթել ընտրակեղծարարների հոգիների համար»,- իր և ՀՀ ոստիկանապետ Վլադիմիր Գասպարյանի համատեղ աղոթքը վերհիշեց Րաֆֆի Հովհաննիսյանը:

Նա հավելեց, որ պայքարը շարունակվում է, իսկ ավելի ուշ ավելացրեց, որ ամեն ինչ փոխվելու է այս տարվա մեջ։

Րաֆֆի Հովհաննիսյանը հպարտություն հայտնեց առ այն, որ պայքարի գիտակցություն կա ազատամարտիկների մոտ, «գյուղական իրավունքների արդարություն», շինարարական արդարություն՝ ի դեմս Կոմիտաս 5 հասցեի ու Սիսակյանի բնակիչների, տրանսպորտի թանկացման դեմ պայքարող ակտիվիստների:

Ըստ Րաֆֆի Հովհաննիսյանի, առաջիկայում, երբ գազի գինը զգացնել պիտի տա, գյուղացիները «հզոր հարված» են հասցնելու շրջակա միջավայրին:

Նա կրկին կոչ արեց միասին ստեղծել Անկախության օրակարգը, վեր հառնել անձնակենտրոն մոտեցումներից, հաղթահարել իր խոսքով՝ արհեսատական վիհը՝ քաղաքական և քաղաքացիական շարժումների:

Անդրադառնալով Սյունիքի մարզին, Րաֆֆի Հովհաննիսյանը ասաց.« Պարոն Լիսկան (Սյունիքի նախկին մարզպետ Սուրիկ Խաչատրյանը – Tert.am) հրաժարական տվեց մարդասպանությունից հետո, բայց այստեղ ևս արդարադատության խնդիր է»։
 

Այնուհետև նա ներկայացրեց Սյունիքի մարզն ընդգրկող թիվ 38 ընտրատարածքի իրենց թեկնածուին՝ Սամվել Հայրապետյանին: Րաֆֆի Հովհաննիսյանը նշեց, որ հենց նա է, ով իշխանությունը վերադարձնելու է Սյունիքի ժողովրդին:

20.02

Թիվ 38 ընտրատարածքի թեկնածու Սամվել Հայրապետյան. մենք դե յուրե անկախություն ունենք

Թիվ 38 ընտրատարածքում ԱԺ մեծամասնական ընտրակարգով լրացուցիչ ընտրություններին «Ժառանգություն» կուսակցության կողմից առաջադրված թեկնածու Սամվել Հայրապետյանը հայտարարեց, որ անկախությունից 23 տարի անց Հայաստանը միայն դե յուրե թղթի վրա ունի անկախություն: Բայց ոչ դե ֆակտո, քանի որ իշխանությունները անկախությունը վաճառել են:

«Ինքնիշխան պետությունը այն է, որ երկրի համար վճռական պահերին կարողանում է որոշում ընդունել, իսկ երկրի իշխանությունները չեն կարողանում: Իսկ եթե չեն կարողանում, իրենց պարտադրում են դրսից՝ որոշումներ ընդունելու համար: Միթե՞ սա էր մեր ուզած անկախությունը, որին մենք ձգտում էինք»,- ասաց ազատամարտիկը:

Նա կրկնեց, որ այսօր ազատամարտիկները տոտալ մոբիլիզացիա են հայտարարել և ավելացրեց, որ միայն տանկը չէ պատերազմը և որ այսօր «տարբեր գույների» ու թունավոր պատերազմ է ընթանում:

«Եվ այս պատերազմին մենք մի անգամ ևս կոչ ենք անում մոբիլիզացիայի՝ «եկե՛ք համախմբվենք միասին, հաղթանակե՛նք այս պատերազմում, տա՛նք մեր Հայաստանը մեր զավակներին»,- հայտարարեց Սամվել Հայրապետյանը, ով ակնարկելով հանրահավաքին ներկաների սակավությունը՝ նկատեց, որ Սևակի խոսքերը, որ «Մենք քիչ ենք, բայց մեզ հայ են ասում», հենց այս դեպքերի համար են ասված:

20.14

Բանակը դրեցին իմ առաջ. Աշխարհիկ Ստեփանյան 


Ելույթով հանդես եկավ նաև բանակում սպանված զինծառայող Լյուքս Ստեփանյանի հայրը՝ Աշխարհիկ Ստեփանյանը, ով վերհիշեց այն օրը, երբ որդու դիակը՝ դագաղի մեջ դրած ուղևորվում էր Երևան, սակայն նրա գալը խոչընդոտվեց զանազան ուժային կառույցների կողմից:

«Բանակը դրեցին իմ առաջ, Վովա Գասպարյանն իրա շրջապատով, զորքերով…»,-հայտարարեց որդեկորույս հայրը՝ նշելով, որ չնայած խոստումներին, որդու սպանությունը այդպես էլ չբացահայտվեց:

Աշխարհիկ Ստեփանյանը ելույթի ընթացքում մերթ ընդ մերթ հուզում էր և խոսում դադարներով, որոնց ժամանակ հավաքի մասնակիցները ծափահարում էին։

20.29

Ուղիղ չորս անգամ սկսել ենք վատ ապրել. Սուսաննա Մուրադյան


«Ժառանգություն» կուսակցության անդամ Սուսաննա Գասպարյանը հարթակից հայտարարեց, որ Հայաստանում մարդիկ սկսել են վատ ապրել և ավելացրեց, որ «քարավանները կանգնեցնելու ժամանակն է։

«Հայաստանը հիվանդ է, հայաստանցին հիվանդ է, բժիշկը նույն ինքը հայն է»,- նկատեց նա՝ ներկայացնելով երկու թիվ: Ըստ այդմ՝ եթե 1996 թվականին աղքատությունը մեր երկրում 18% էր, 2004 –ին՝ 23%, ապա 2008–ից հետո դարձավ 35%, ապա 2011-2012–ի ընթացքում 44%:

«Ժառանգության» անդամը ներկայացրեց արտագաղթին վերաբերող ցուցանիշ՝ նշելով, որ նույն պետական վիճակագրական ծառայության տվյալներով՝ Հայաստանը լքել է 106 hազար մարդ:

«Քարավանները կանգնեցնելու ժամանակն է»,- ասաց Սուսաննա Գասպարյանը:
Ըստ նրա՝ Հայաստանի իշխանությունները և նրանց ընտանիքները Հայաստանում չեն ապրում, հանգստանում և ամեն վայրկյան պատրաս են վերցնել ճամպրուկները և հեռանալ երկրից:

 

Դիմելով տարբեր հասարակական նախաձեռնություններին նա առաջարկեց. «Մի կողմ դնենք փոքրիկ խանդերը, փոքրիկ տարաձայնությունները չնչին բան են մեր լուծելիք խնդրի առաջ»։
 

20.32

Մենք անկախ չենք, մեր անտեր ենք. կարծիքներ անկախության մասին

Ելույթ ունեցավ նաև «Ժառանգության» անդամ Դավիթ Սանասարյանը, ով շնորհավորելով 23 տարի առաջ այս օրը ընդունված Անկախության հռչակագրի կապակցությամբ, ափսոսանք հայտնեց, որ «Անկախություն» բառը լսելուց դեռևս դա լիովին չենք հասել իրական անկախության:

«Մենք անկախ չենք, մենք անտեր ենք»,- նրան ընդհատեցին առաջին շարքերից:

Դավիթ Սանասարյանը ցավ հայտնեց, որ այդ անկախության խոհրդանիշներից մեկի՝ բանակի՝ «սպաները զբաղվում են ընտրակեղծարարությամբ»: Նա նշեց, որ վարկաբեկված են մյուս պետական ինստիտուտները:

20.48

Րաֆֆի Հովհաննիսյանը վերսկսում է հավաքները՝ միանալով ազատամարտիկներին

Հանրահավաքն ամփոփելուց առաջ Րաֆֆի Հովհաննիսյանը ընթերցեց Հանրային պահանջ, որի առաջին նախադասությունն ասում էր այն մասին, որ այսպես շարունակել չի կարելի:

Րաֆֆի Հովհաննիսյանը նկատեց, որ առանձին–առանձին պայքարը, պուրակներում «մեր բնակարանների համար» պայքարը բանակում խաղաղ պայմաններում զոհվող երիտասարդների համար ոչ մի տեղ չի հասնելու:

«Դրա համար առաջարկում եմ, քանի ուշ չէ, քանի հաղթանակը կերտել ենք 90 տոկոսով և այն մեր ձեռքերի մեջ է, մի կողմ դնենք մեր սխալականությունը»,-ազատամարտիկներին, ուսանողներին, քաղաքացիական նախաձեռնությունների, այլ քաղաքական ուժերին և անգամ ոստիկաններին ու բանակում ծառայողներին դիմեց Րաֆֆի հովհաննիսյանը:

Նա նշեց, որ եթե միավորման ուժը գտնվի, ապա կգտնվեն նաև «տրանսպորտային զեղումների», օֆշորի և մյուս հիմնախնդիրների պատասխանները:

Րաֆֆի Հովհաննիսյանը հավելեց, որ ոչ թե թեժ աշուն է սպասվում, այլ հրամայական պայքար՝ կերտելու համար նոր Հայաստանը:

Որպես քաղաքացի Րաֆֆի հովհաննիսյանը և «Ժառանգությունը»՝ իր համակիրներով, քաղաքական կուսակցություններով ու «միլիոնավոր ընտրողներով» անխտիր լինելու է բոլոր վայրերում, որտեղ հոգս կա. Կոմիտաս 5 հասցեում, գյուղերում ու պուրակներում, քաղաքապետարանի առջև:

Հաջորդ հինգշաբթի՝ օգոստոսի 29 –ին, հայտարարված ազատամարտիկների հանրահավաքը Րաֆֆի Հովհաննիսյանը համարում է իրենը և ասաց, որ կհանդիպեն Ազատության հրապարակում:

Դրա հաջորդ ուրբաթ օրը՝ ժամը 16-00-ին, Րաֆֆին հովհաննիսյանը հանրային ժողով կանի Վանաձորի մշակույթի տան բակում, ավելի ուշ՝ Գյումրիում: Սեպտեմբերի 1-4-ը կլինեն Արցախում, 5-ին կամ 6-ին՝ Երևանում և Ազատության հրապարակում կմիանան ազատամարտիկների հանրահավաքին: