Մաքսատուրքերի փոփոխությունը մտահոգել է տոնավաճառի աշխատակիցներին, սակայն կթանկանա հիմնականում բրենդային հագուստը

Ինչպես ներկայացրել է «Իրազեկ քաղաքացիների միավորում» կազմակերպությունը` 2015 թվականի հունվարի 1-ից Հայաստանի՝ Եվրասիական տնտեսական միությանն անդամակցության արդյունքում  գործող մաքսային դրույքաչափերի շուրջ 90 տոկոսը փոփոխվելու է:

Tert.am-ը զրուցեց «Ֆիրդուսի» կոչվող` հագուստի և այլ ապրանքների տոնավաճառի աշխատակիցների հետ՝ պարզելու, թե ինչ հետևանքներ կունենա մաքսատուրքի թանկացումը:

«Մաքսատուրքի բարձրացումը ազդելու է մեզ վրա, եթե մենք բարձրացնենք ապրանքի գինը, այն չի վաճառվի, որովհետև սա Ֆիրդուսի տոնավաճառն է, խանութ չէ: Մարդիկ սովոր են, որ այստեղ պետք է էժան լինի»,-ասաց վաճառողներից Կարեն Համբարձումյանը և նշեց, որ չնայած դոլարի փոխարժեքի բարձրացմանը` իրենք գինը չեն բարձրացրել: Նա ասաց, որ անձամբ ինքը Ստամբուլից է ապրանքը բերում:

«Եթե ավելի թանկ լինի բերելը, չենք էլ գնա և բերի, այլընտրանք չի լինի, կմնա տաքսի վարել»,-ասաց նա:

Մեկ այլ աշխատող՝ Մամիկոն Խաչատրյանը ևս նշեց, որ եթե մաքսատուրքերը բարձրանան, հագուստի գինը բնականաբար կթանկանա: Նա ասաց, որ մեծ մասամբ հագուստ ներկրում  են Ստամբուլից, ինչ-որ չափով էլ՝ Չինաստանից:  «Որքան կբարձրանան մաքսատուրքերը, այնքան էլ կթանկանա հագուստի գինը»,-ասաց նա:

Նա նկատեց, որ այժմ արդեն առևտուրը բավականին նվազել է: «Հիմա առանց այն էլ առևտուր չկա, հետագայում  առևտրի վիճակն ավելի կվատանա  և կախված նաև այս հանգամանքի հետ՝ մանր բիզնեսը ոչնչացման եզրին կկանգնի»,-ասաց նա և նշեց, որ մարդկանց գնողունակությունը բարձրացնելու համար պետք է աշխատանք լինի, ոչ թե հույսը պետք է դնել Ռուսաստանից եկող տրանսֆերտների վրա:

«Այսօր  Ռուսաստանի վիճակը վատ է, հետևաբար այստեղի սոցիալական վիճակն ավելի է վատանում և սրվում»,-ասաց նա:

Մեկ այլ աշխատակից էլ՝ Յուրի Ազբեկյանցը, նշեց, որ երկրում  մարդ չի մնացել, իրացման շուկա չկա:  «Շատ քիչ են ապրանքները  սպառվում, մարդկանց ձեռքը գումար չկա, եթե թանկանա, էլ ժողովուրդ չի մնա այստեղ: Առանց այն էլ շատ քիչ են մնացել, եղածն էլ՝ գնում է:  Հունվարից հետո էլի գնացողներ շատ կան»,-ասաց նա:

Յուրի Ազբեկյանցը նույնպես նշեց, որ մաքսազերծման գնի բարձրացման հետևանքով բնականաբար գինը կփոխվի: «Հիմա մարդկանց գնողունակությունը շատ ցածր է, այսօր  պետք է հնարավոր չլիներ «Ֆիրդուս» մտնել, սակայն հիմա մարդ չկա: Ժողովրդի ձեռքը  հնարավորություն չկա»,-ասաց նա։

Հենրիկ Աղաջանյանի կարծիքով էլ դեռ ամեն ինչ պարզ չէ: «Մեր կառավարությունը դեռ չգիտի, թե ինչպես է լինելու մաքսային վիճակը, դա ոչ  կարող է բիզնեսմենը ասել, ոչ էլ կառավարության ներկայացուցիչը: Հավանական է, որ եթե դոլարը բարձրանա,  ինքնաբերաբար կբարձրանա նաև հագուստի գինը»,-ասաց նա և նշեց, որ վերջին շրջանում դոլարի բարձրացման պատճառով իրենք գինը  չեն թանկացրել, ընդհակառակը` էժանացրել են` որ ապրանքը վերջանա:

«Հունվարից հետո պարզ կլինի՝ ընդհանրապես ձեռք կտա՞ աշխատել, թե ոչ: Սպառումը շատ վատ է, ահավոր վատ է՝ 5-10 տարվա հետ համեմատ 10 անգամ վատացել է, ժողովուրդը գումար չունի»,-ասաց նա:

Մեկ այլ աշխատող ևս կարծում է, որ եթե մաքսատուրքերը  բարձրանան, մարդիկ ապրանք չեն բերի: «Մենք գինը չենք բարձրացրել, տույժով աշխատում ենք, որովհետև եթե բարձրացնենք, ժողովուրդը չի առնելու և մեր ապրանքը լճանալու է, ստիպված իրա գներով ենք վաճառում, մինչև տեսնենք՝ ինչ է լինելու»,-ասաց նա և նշեց, որ դոլարի փոխարժեքի  բարձրացման ժամանակ իրենք ապրանք չեն բերել:

«Շատերն ասում են, որ Նոր տարուց հետո, եթե այսպես շարունակվի, չեն կարողանալու աշխատել»,-ասաց նա:

Մեկ այլ աշխատող էլ կարծում է, որ թանկացման հետևանքով ժողովուրդը ճարահատյալ ինչ ունենալու է, այն էլ կրելու է: «Մանր բիզնեսը կամաց-կամաց մեռնում է: Այն  ժամանակ ինչպես էին կարկատան անում մարդիկ իրենց շորերը, այնպես էլ այժմ՝ ամենացածր խավը կսկսի կարկատան անել, մեկը մյուսի շորը հագնել»,-ասաց նա և նշեց, որ իրենք հիմնականում ապրանքը  բերում են Դուբայից, Թուրքիայից, Չինաստանից:

«Քանի գնում է՝ տարին տարվա վրա առևտուրը շատ վատանում է:  Ամեն ինչ մենաշնորհ են դարձրել: Բոլորը սպասում էին դեկտեմբերին, սակայն որոշների մոտ սնանկ վիճակ է և չեն աշխատում»,-ասաց նա:

Փորձեցինք նաև իմանալ, թե ինչ սպասումներ ունեն խանութների ներկայացուցիչները: Երևանում «Օ վի էս» (OVS) հագուստի խանութների ցանցի մենեջերը Tert.am-ին տեղեկացրեց, որ մի քանի օր առաջ իրենք խանութի ամբողջ տեսականու գներն իջեցրել են՝ պայմանավորված դոլարի փոխարժեքի իջեցմամբ: Սակայն եթե հունվարից սկսած ոչ ԵՏՄ անդամ երկրներից Հայաստան ներկրվող ապրանքների մաքսատուրքերը բարձրանան, թանկացումներն անխուսափելի կլինեն:

«Եթե մենք ապրանքի համար ստիպված լինենք ավելի շատ հարկ վճարել, տրամաբանական է, որ տվյալ ապրանքն ավելի թանկ գնով կվաճառենք»,-ասաց մենեջերը՝ ավելացնելով, որ իրենք դեռ նման կանխատեսումներ չեն անում:

Բրենդային կաշվե պայուսակներ ներմուծող խանութներից մեկի մենեջերն էլ ասաց, որ ներկրվող ապրանքների 80 %-ի գները չեն բարձրանա:

«Այն ապրանքները, որոնք համարվում են առաջին սպառման ապրանքներ և առանձնապես թանկ չեն, նրանց մաքսատուրքը չի բարձրանա: Իսկ բրենդային ապրանքները, որոնք չեն համարվում առաջին սպառման, կթանկանան, քանի որ եթե դրանք մինչ հիմա 10% մաքսատուրք էին վճարում, այսուհետ կվճարեն 19%»,-ասաց նա: