Երկնաքերերի տանիքին արածող կովեր, եռաչափ տպված տներ. ինչ տեսք կունենա աշխարհը 100 տարի անց (լուսանկարներ, տեսանյութ)

Բրիտանական մի շարք համալսարանների գիտնականներ և փորձագետներ, ներառյալ՝ Վեսթմինսթերի համալսարանը, կանխատեսումներ են արել, թե աշխարհն ինչ տեսք կունենա մոտ 100 տարի անց, գրում է Daily Mail-ը։

Նրանք ներկայացրել են համատեղ զեկույց, որում նշվում է, որ մոտ մեկ դար անց ճանապարհները և մայրուղիները կառուցվելու են օդում, մարզադաշտերն ու մարզահամալիրները լինելու են ստորգետնյա, իսկ կենդանիների համար նախատեսված արոտավայրերը ստեղծվելու են երկնաքերերի տանիքներին։

Ստորգետնյա կառույցները լինելու են ապագայի ճարտարապետների սիրելի շինությունները, պնդում են մասնագետները։ 

Շատ տներ հնարավոր է լինելու «տպել» դրա համար նախատեսված հատուկ ճարտարապետական եռաչափ տպիչով։

Ստորգետնյա սուպերմարկետները, հյուրանոցներն ու համալսարաններն ունենալու են հատուկ կառավարման համակարգեր, որոնք ղեկավարելու են գետնի տակ բուսականության աճը, օդի ջերմաստիճանը և դրա մաքրությունը։

Մասնագետներից շատերն էլ գտնում են, որ նորագույն տեխնոլոգիաների զարգացման ժամանակակից տեմպերով նման նորամուծություններն իրենց 50 տարուց ավելի երկար սպասել չեն տա։