Ռուսաստանում ձերբակալվել է PayPal-ի ավելի քան 600.000 գաղտնաբառ գողացած հաքերը

16:27 • 28.05.15

ՌԴ Անվտանգության դաշնային ծառայության Կրասնոյարսկի երկրամասի վարչության աշխատակիցները ձերբակալել են 27-ամյա հաքերի, ով PayPal էլեկտրոնային վճարման համակարգի հաշիվների ավելի քան 600.000 գաղտնաբառ է գողացել, գրում է ТАСС գործակալությունը։

«Ներկա պահին նա ձերբակալված է»,-ասել է ԱԴԾ-ի ներկայացուցիչ Մարինա Մոիսեևան։

Նրա խոսքով՝ ձերբակալվածի դեմ հարուցվել է քրեական գործ՝ բանկային գաղտնիք պարունակող տեղեկություններ ձեռք բերելու և հրապարակելու համար։

ԱԴԾ-ից հայտնել են նաև, որ հաքերն ավելի քան երկու տարի առաջ մի քանի վեբկայք է բացել, որոնց օգնությամբ ստացել է օգտատերերի PayPal հաշիվների գաղտնաբառերը և դրանք հետագայում վաճառել։