Հրատարակվել է Հայաստանի գյուղատնտեսական առաջին հանրագիտարանը

ՀՀ գյուղատնտեսության նախարարության նախաձեռնությամբ հրատարակվել  է  Հայաստանի գյուղատնտեսական առաջին հանրագիտարանը, որի շնորհանդեսը տեղի է ունեցել այսօր «Արմենիա Մարիոթ» հյուրանոցում: Միջոցառման պաշտոնական արարողությանը մասնակցում էին ՀՀ գյուղատնտեսության նախարար Սերգո Կարապետյանը, ՀՀ գիտությունների ազգային ակադեմիայի նախագահ Ռադիկ Մարտիրոսյանը, Հայկական հանրագիտարանի գլխավոր խմբագիր Հովհաննես Այվազյանը,  գիտնականներ, դասախոսներ, պաշտոնյաներ:  

Այս մասին հայտնում են ՀՀ ՀՀ գյուղատնտեսության նախարարության տեղեկատվության և հասարակայնության հետ կապերի բաժնից։

Հանրագիտարանը պարունակում է համապարփակ տեղեկություններ ՀՀ գյուղատնտեսության, գյուղատնտեսական գիտությունների, հարակից տնտեսության ճյուղերի և բնագավառների վերաբերյալ, տեղեկությունների  ոլորտում էական ներդրում ունեցած հայ գիտնականների, ինչպես նաև տարբեր ժամանակահատվածներում գյուղատնտեսության ասպարեզում աչքի ընկած, պետական պարգևների արժանացած անձանց մասին: Լուսաբանված են գյուղատնտեսության ոլորտի հարաբերությունները կարգավորող հիմնական իրավական ակտերը: 

ՀՀ գյուղատնտեսության նախարար Սերգո Կարապետյանն իր ողջույնի խոսքում մասնավորապես նշել է, որ հանրագիտարանի ստեղծմանը նախորդել է շուրջ երկու տարվա հսկայածավալ և գնահատելի աշխատանք և շնորհակալություն է հայտնել  հանրագիտարանի ստեղծման գործում իրենց ավանդը ներդրած անձանց և կազմակերպություններին: 

«Հաշվի առնելով, որ գյուղատնտեսությունը մեր երկրում համարվում է տնտեսության գերակա ոլորտ` մենք  առանձնակի կարևորում ենք նաև հայ գյուղացու և գյուղատնտեսության ոլորտի աշխատողների իմացության մակարդակի բարձրացումը, որին, հուսով ենք, մեծապես կնպաստի հրատարակված հանրագիտարանը»,-իր խոսքում նշել է ՀՀ գյուղատնտեսության նախարարը:

Նախարարը հավելել է, որ գյուղատնտեսական հանրագիտարանը` որպես թեմատիկ հանրագիտարան առաջինը լինելով, ամբողջացնում է նաև Հայաստանի գյուղատնտեսության անցյալի ու ներկայի պատմությունը, ուստի այն գյուղի աշխատավորից, գյուղատնտեսության տնտեսավարողներից բացի, կարող է օգտակար լինել նաև մասնագետների լայն շրջանակների և ուսանողների համար:

ՀՀ գիտությունների ազգային ակադեմիայի նախագահ Ռադիկ Մարտիրոսյանն իր հերթին, կարևորելով նման նախաձեռնությունը, նշել է, որ ՀՀ գյուղատնտեսության նախարարությունը մեր երկրի ամենաակտիվ գործող գերատեսչությունն է, որն աչքի է ընկնում գյուղատնտեսության ոլորտին նվիրված բազմաթիվ միջոցառումների հաճախակի կազմակերպմամբ, և այսօրվա նախաձենությունն այդ ակտիվության դրսևորումներից մեկն է: Նա նաև հավելել է, որ գյուղատնտեսության նախարարության համագործակցությունը Գիտությունների ազգային ակադեմիայի հետ ունի տարիների վաղեմություն, և նախարարության ներկայացուցիչները մշտապես պատրաստակամություն են հայտնել կիրառել ԳԱԱ աշխատակիցների գիտական նորույթները` ի նպաստ ոլորտի զարգացման:

Միջոցառման ավարտին հանրագիտարանի մշակման և հրատարակման գործում արդյունավետ և արգասաբեր աշխատանքներ իրականացնելու համար Գիտությունների ազգային ակադեմիայի, Հայաստանի ազգային ագրարային համալսարանի, «Տիգրան Մեծ հրատարակչության» և նախարարության մի շարք աշխատակիցներ պարգևատրվել են ՀՀ գյուղատնտեսության նախարարի շնորհակալագրերով: