Սերես գաճաճ մոլորակի վրա բուրգանման գոյացություն է հայտնաբերվել (լուսանկարներ)

ԱՄՆ-ի ազգային օդատիեզերական գործակալությունը` ՆԱՍԱ-ն, Dawn տիեզերական սարքի միջոցով լուսանկարել է Սերես գաճաճ մոլորակը, որի վրա մասնագետները հայտնաբերել են բուրգանման գոյացություն:

Ինչպես նշում է dailymail.co.uk-ը, ըստ մասնագետների՝ դա  լեռ է, որի բարձրությունը հասնում է մոտավորապես 5 կմ-ի: Աղբյուրը մանրամասնում է, որ ուշագրավ լուսանկարներն արվել են 4.400 կմ հեռավորության վրա: «Բուրգից» զատ լուսանկարների ուսումնասիրության շնորհիվ Սերեսի վրա հայտնաբերվել են առեղծվածային սպիտակ կետեր, որոնց ծագման աղբյուրը ևս անհայտ է:

Նշվում է, որ այս տարվա դեկտեմբերին Dawn-ը շատ ավելի մոտ կգնա Սերեսին, ինչից հետո դրանց միջև հեռավորությունը կլինի ընդամենը 360 կմ: Դա հնարավորություն կտա ավելի լավ ուսումնասիրել առեղծվածային օբյեկտն ու գաճաճ մոլորակին առնչվող նոր հայտնագործություններ անել: