Բաղրամյան պողոտայից ոստիկանության բաժին տարված բոլոր քաղաքացիներն ազատ են արձակվել. Աշոտ Ահարոնյան

Հիշեցնենք, որ երեկ ցուցարարները հայտարարել են, որ եթե մինչև երկուշաբթի իշխանությունները իրենց պահանջներից գոնե մեկը չկատարեցին, աղբամանները մեկ քայլ առաջ են տանելու դեպի Բաղրամյան 26։

Հիշեցնենք, որ ՀՀ ՀԾԿՀ-ն հունիսի 17-ին որոշում է կայացրել էլեկտրաէներգիայի սակագինը բարձրացնել 6,93 դրամով: Հունիսի 19-ին Երևանի կենտրոնում` Ազատության հրապարակում, մեկնարկել է բողոքի ակցիա` հանրահավաք, այնուհետև` նստացույց:  ՀՀ Նախագահ Սերժ Սարգսյանը հունիսի 27-ին խորհրդակցություն է անցկացրել հանրապետության տնտեսական քաղաքականության պատասխանատուների հետ, որի ընթացքում շարունակվել են Հայաստանի էներգետիկ անվտանգությանը, այդ համակարգի հետագա առողջացմանը և առկա խնդիրներին լուծումներ գտնելուն ուղղված քննարկումները:
 

Նախագահ Սարգսյանը նշել է, որ սակագնի բարձրացումը չեղյալ հայտարարելը ծայրահեղ վտանգավոր է: Ուստի, մինչև եզրակացության կազմումը այդ ընկերության կողմից կառավարությունը իր վրա կվերցնի սակագնի բարձրացման ամբողջ բեռը: Դրանից հետո «Ոչ թալանին» նախաձեռնության անդամները որոշեցին գալ ու ակցիան շարունակել Ազատության հրապարակում, սակայն ցուցարարների մի մասը մնաց Բաղրամյան պողոտայում:

15:02

Բաղրամյան պողոտայից ոստիկանության բաժին տարված բոլոր քաղաքացիներն ազատ են արձակվել. Աշոտ Ահարոնյան
 

Բաղրամյան պողոտայից ոստիկանության տարբեր բաժիններ են տարվել 46 քաղաքացի: Այս մասին Tert.am-ի հետ զրույցում ասաց ոստիկանության լրատվության և հասարակայնության հետ կապերի վարչության պետ Աշոտ Ահարոնյանը:
 

«Նրանցից 6 անչափահասներն անմիջապես ազատ են արձակվել: Մնացած 40 քաղաքացիները նույնպես ազատ են արձակվել»,- տեղեկացրեց Աշոտ Ահարոնյանը:

14:16

«19:00-ին հավաքվում ենք Ազատության հրապարակում, մենք չենք նահանջում, մեր պայքարը շարունակվում  է»,- Բաղրամյան պողոտայում լրագրողների հետ զրույցում ասաց նստացույցին մասնակցող ակտիվիստներից մեկը:

Հարցին, թե Ազատության պողոտայից գնալու են Բաղրամյան պողոտա, ակտիվիստը պատասխանեց, թե դա տեղում կորոշեն: Նա  ասաց, թե իրենք կարծում են, որ ոստիկաններն ապօրինի են իրենց ընկերներին բերման ենթարկել:

«Մենք մեր պահանջի տերն ենք, այն չի կատարվել, պայքարելու ենք այնքան ժամանակ, մինչև մեր պահանջները կկատարվեն»,- հայտարարեց ակտիվիստը:

14:04

Բաղրամյան պողոտայում մարդիկ հավաքվել են մայթերին՝ բերման ենթարկված ցուցարարներին ազատ արձակելու պահանջով:

Ոստիկանությունն էլ նրանց հավաստիացնում է, որ ամենաուշը մեկ ժամից նրանք բոլորն ազատ կարձակվեն ու հորդորում են նրանց սպասել Ազատության հրապարակում:
 

13:56

Ակտիվիստներ Անդրիաս Ղուկասյանը և Արգիշտի Կիվիրյանը ոստիկաններին կոչ են անում հեռանալ տարածքից և թույլ տալ իրենց իրենց իրավունքների սահմաններում խաղաղ հավաք իրականացնել:

13:46

Ազգային ժողովի «Բարգավաճ Հայաստան» խմբակցության անդամ Վահե Էնֆիաջյանը լրագրողների հետ զրույցում անդրադառնալով քիչ առաջ ոստիկանների կողմից Բաղրամյան պողոտան բացելուն՝ ասաց.«Տարբեր խմբակցության պատգամավորներ, մենք այդ համարձակությունը մեր մեջ գտանք ներկա գտնվելու, որպեսզի անդառնալի բաներ չլինեն, որպեսզի մեր երկրի հեղինակությունը չտուժի, որպեսզի մեր երկրի քաղաքացիների համար անցանկալին տեղի չունենա»: 

Նա և նշեց, որ իրենց քաղաքական գնահատականը ավելի ուշ կտան։ 

13:30

Երևանի փոխոստիկանապետ Վալերի Օսիպյանը հայտարարեց, որ բերման ենթարկվածների նկատմամբ որևէ գործողություն, հետապնդում չի իրականացվելու, նրանք բաց են թողնվելու: «Ամեն դեպքում իրենց շնորհակալություն, իրենք իրենց պահել են շատ լավ՝ որպես ՀՀ արժանապատիվ քաղաքացիները, նաև հաղթանակը բոլորին է: Հավաստիացնում եմ, որ նրանց նկատմամբ ոստիկանությունը հետապնդում չի իրականացնի և չի բացառվում, որ հիմա էլ ազատ արձակվեն»,-ասաց նա։

13:29

Ոստիկանության հորդորները չլսողները  ոստիկանները նստեցրին ոստիկանական մեքենաներ և տարան ոստիկանական բաժին: Բաղրամյան պողոտան այս պահին բացվեց և մեքենաները կարողացան երթևեկել:

13:19

Ոստիկանությունը հեռացրեց Բաղրամյանում կենդանի պատ կազմած ցուցարարներին:

13:14

Բաղրամյան պողոտայում է Ազգային ժողովի պատգամավոր Նիկոլ Փաշինյանը:

Փոխոստիկանապետ հունան Պողոսյանի հետ զրույցում նա ասաց, թե բռնությունը պետք է բացառել:
«Բռնություն չի լինելու, մենք հորդորում, խնդրում, պահանջում ենք, որ իրենք ազատեն երթևեկելի մասը: Բռնություն չենք կիրառելու, իրենց հեռացնելու ենք ճանապարհի բանուկ մասից»,- ասաց Հունան Պողոսյանը՝ Նիկոլ Փաշինյանին ասելով, թե թող իր հեղինակությունն օգտագործի՝ կոչ անելով բացել փողոցը:

13։04

«Ո՛չ թալանին» նախաձեռնության անդամ Մաքսիմ Սարգսյանն ասաց, թե չի հասկանում աղբամանները տանելու իմաստը, եթե նստացույցը Բաղրամյան պողոտայում շարունակվելու է:

13։02

Բաղրամյան պողոտայում է Ազգային ժողովի «Բարգավաճ Հայաստան» խմբակցության անդամ Էլինար Վարդանյանը: Վերջինս ասաց, թե դժվարանում է գնահատական տալ այս պահին Բաղրամյանում տեղի ունեցող իրադարձությունների մասին:

«Բոլորիս գերխնդիրն է, որ մասնակիցներից որևէ մեկի նկատմամբ բռնություն չկիրառվի և օրենքի խախտումներ չարձանագրվեն: Երկու կողմերն էլ պետք է ողջախոհ և ավելի զգոն լինեն, որպեսզի չկրկնվի հունիսի 23-ի իրադարձությունները»,- ասաց Էլինար Վարդանյանը:
 

12։50

Բաղրամյան պողոտայում ոստիկանների թիվն ավելանում է: Ավելանում է նաև ցուցարարների թիվը:


Աղբամանները տեղափոխում են բեռնատար մեքենաների մեջ:

Երևանի փոխոստիկանապետ Վալերի Օսիպյանը կոչ է անում միասին վերականգնել Բաղրամյան պողոտայի այն տեսքը, որը մինչ այս ունեցել ենք:

«Եկեք միասին մաքրենք աղբը»,- հորդորեց Վալերի Օսիպյանը:

«Երբ աղբամաններն էիք ապամոնտաժում, կոչ չարեցիք միասին անել դա»,- պատասխանեցին ակտիվիստները:
 

12։46

Ոստիկաններն ապամոնտաժեցին Բաղրամյան պողոտայում որպես բարիկադ տեղադրված աղբամանները

Ոստիկաններն ապամոնտաժեցին Բաղրամյան պողոտայում որպես բարիկադ տեղադրված աղբամանները: «Սանիթեք»-ի աշխատակիցները տանում են աղբամանները:

12։43

Ոստիկաններն անցան գործողությունների և բարիկադների դեր տանող աղբամանները փորձում են հեռացնել Բաղրամյան պողոտայից:

12։42

Այս պահին Բաղրամյան պողոտայում լարված իրավիճակ է: Փոխոստիկանապետ Հունան Պողոսյանը հորդորում է լքել Բաղրամյան պողոտան և նստացույցը շարունակել Ազատության հրապարակում:

Ցուցարարները բարիկադների մոտ փողոցի լայնքով կարմիր ժապավեն են կապում՝ փորձելով ոստիկանությանը թույլ չտալ բացել Բաղրամյան պողոտայի երթևեկելի հատվածը:

Ոստիկանությունը քիչ առաջ կրկին զրուցեց նախաձեռնության անդամ Դավիթ Սանասարյանի հետ, հորդորեց սադրանքների չդիմել և բացել Բաղրամյան պողոտան:

Ցուցարարները նստել են Բաղրամյան պողոտայում և երգում են:

12։31

Մենք խաղաղ ցուցարարներ ենք, ու ինչ անելու եք, սա սադրանք է դիտվելու. Դավիթ Սանասարյանը՝ ոստիկաններին

«Ժառանգության« մամուլի խոսնակ Դավիթ Սանասարյանը նկատեց, որ «գնում ենք բանակցությունների, բայց ոստիկանությունը….», ինչին ի պատասխան՝ Երևանի փոխոստիկանապետ Վալերի Օսիպյանն ասաց, որ անթույլատրելի է ոստիկանության հետ պայմաններով խոսելը:

«Մենք խաղաղ ցուցարարներ ենք, ու ինչ անելու եք, սա սադրանք է դիտվելու»,-Դավիթ Սանասարյանը նկատեց, որ ժողովուրդը պետք է որոշի՝ ինչ անել:
Ըստ նրա՝ եթե մի բան եղավ, դրա ողջ պատասխանատվությունը կրելու է ոստիկանությունը:

12:21

Ոստիկանությունը մինչև 12:30 Բաղրամյանի աղբամանները հավաքելու ժամանակ է տվել
 

Ոստիկանությունը Բաղրամյան 3-ում արդեն երկու շաբաթ գիշերող ցուցարարներին մինչև 12:30-ը աղբամանները հավաքելու ժամանակ տվեց, այլապես ժամկետի ավարտին դա կանի ոստիկանությունը:

Այս մասին հայտարարեց  Երևանի փոխոստիկանապես Վալերի Օսիպյանը և փոխոստիկանապետ Հունան Պողոսյանը: «Որևէ մեկիդ նկատմամբ կոպիտ գործողություն չի լինի, եթե տղաներ, աղջիկներ, էլ ոնց դիմեմ, եթե չսադրեն»,- խոստացավ Հունան Պողոսյանը:

Հունան Պողոսյանը հորդորեց. «Եկեք նորմալ, մարդավարի՝ քաղաքակրթության շրջանակներում այս հարցը լուծենք»: Ըստ փոխոստիկանապետի՝ բողոքելու ցուցարարների իրավունքը բացարձակ իրավունք չէ:

«Քո իրավունքը իմ իրավունքն էլ է, տղա ջան»,-ասաց Հունան Պողոսյանը և հիշեցրեց, որ ցույցը թեև խաղաղ  է, բայց օրինական չէ:

Միևնույն ժամանակ, Վալերի Օսիպյանը կոչ  արեց  գտնել այլընտրանքային հրապարակ, տեղանք, պայմանով, որ ցուցարարները տեղանքը չփակեն:

Աղբամանների մոտ հավաքված՝ երիտասարդները սպասում են: