Caterpillar-ը ներկայացրել է Cat S40 «ամենագնա» սմարթֆոնը (լուսանկարներ)

_{Լուսանկարները՝ ubergizmo.com-ի}

Catepillar ընկերությունը ներկայացրել է Cat S40 սմարթֆոնը, որը նախատեսված է բարդ պայմաններում շահագործվելու համար, գրում է 3dnews.ru-ն։

Նորույթը համապատասխանում է MIL-STD-810G և IP68 ստանդարտներին, ինչը նշանակում է՝ այն հրաշալի պաշտպանված է խոնավությունից, փոշուց և ցնցումներից։

Հետաքրքրական է, որ սարքը կարողանում է աշխատել նույնիսկ մեկ ժամ շարունակ մեկ մետր խորության տակ սուզված լինելուց հետո։ Այն աշխատունակ է նաև մինչև -25C աստիճան և +55C աստիճան տաքության դեպքում։

Բջջայինն ունի 960x540 լուծաչափով 4.7 դյույմանոց էկրան։ Էկրանը քերծվածքներից պաշտպանում է Corning Gorilla Glass 4 ապակին։

Սմարթֆոնի սենսորային էկրանը կարողանում է ճանաչել մատների հպումները՝ նույնիսկ ձեռնոցներ հագած կամ թաց վիճակում։

Այն հրաշալի արտացոլում է տեղեկությունը նույնիսկ արևի ուժեղ ճառագայթների տակ։

Սմարթֆոնն ունի Qualcomm MSM8909 Snapdragon 210 քառամիջուկ պրոցեսոր՝ 1.1 ԳՀց հզորությամբ, ինչպես նաև 1ԳԲ օպերատիվ և 16ԳԲ ներկառուցված հիշողություն։

Այն ունի Wifi և Bluetooth ցանցերին միանալու հնարավորություն։ Cat S40-ն ունի 8 ՄՊ հիմնական և 2ՄՊ դիմային տեսախցիկ։

Սմարթֆոնն աշխատում է Android 5.1 Lollipop օպերացիոն համակարգով։ Քաշը 185 գրամ է, իսկ չափսերը՝ 144,9 × 74,1 × 12,5 մմ։

Նորույթի վաճառքը կմեկնարկի օգոստոսի մեկին։ Այն կարժենա 440 եվրո։