Ինչ տեսք կարող է ունենալ Apple-ի ինքնակառավարվող մեքենան. ներկայացվել են տարբերակներ (լուսանկարներ)

Ողջ աշխարհից մի խումբ գրաֆիկական դիզայներներ ենթադրել են, թե ինչ տեսք կարող է ունենալ Apple ընկերության ինքնակառավարվող մեքենան՝ iCar-ը։ Դա տեղի է ունեցել այն բանից հետո, երբ տեղեկություններ են հայտնվել, որ ընկերությունն աշխատում է մեքենայի ստեղծման ուղղությամբ։

Բրիտանական The Guardian թերթի ձեռք բերած փաստաթղթերից հայտնի է դարձել, որ ընկերությունը վայր է փնտրում ինքնակառավարվող մեքենաները փորձարկելու համար, որոնք պետք է մրցակցեն Google-ի արդեն արտադրած մեքենաների հետ:

Ընկերությունը, որը սովորաբար գաղտնի է պահում իր նախագծերը, դեռ չի հաստատել կամ հերքել բամբասանքները: Դա, այնուամենայնիվ, չի խանգարել Apple-ի երկրպագուներին պատկերացնել, թե մեքենան ինչ տեսք կարող է ունենալ:

Մայիսին Apple-ի աշխատակիցները հանդիպել են Սան Ֆրանցիսկոյի մոտակայքում գտնվող նախկին նավատորմի կայանի տարածքում գործող GoMentum Station ընկերության պաշտոնյաների հետ՝ փորձելով պայմանավորվել վայրի օգտագործման շուրջ:

«Մենք չգիտենք: Նրանք չեն ասել, թե ինչ են ցանկանում փորձարկել: Դա կարող է iPhone լինել»,- կատակել է GoMentum Station-ի՝ միացված և ինքնակառավարվող մեքենաների հարցերով ծրագրի ղեկավար Ջեք Հոլը:

Գործակալությունն առաջարկում է օգտագործել նախկին նավատորմի կայանի մի մասը որպես ավտոարտադրողների և ավտոմոբիլային տեխնոլոգիաների վրա աշխատող տեխնոլոգիական ընկերությունների համար կատարյալ թեստավորման վայր։

Հոլի խոսքով՝ տարածքն ունի քաղաքի բոլոր ենթակառուցվածքները, այնտեղ կան շենքեր, փողոցներ և խաչմերուկներ: Ինչպես նշված է գործակալության կայքում՝ տարածքն «աշխարհում փորձարկման անվտանգ հարմարություններով ամենամեծ վայրն է»։