ՌԴ-ում վերացած կենդանատեսակների կլոնավորման լաբորատորիա է բացվել

Յակուտսկում (Ռուսաստանի Դաշնություն) բացվել է վերացած կենդանատեսակների ԴՆԹ-ների ուսումնասիրման և հնարավոր կլոնավորման լաբորատորիա, գրում է lenta.ru-ն։

Այդ մասին պատմել է Յակուտսկի մամոնտների թանգարանի տնօրեն Սեմյոն Գրիգորևը։ Լաբորատորիայի հիմնական նպատակն է գտնել վերացած կենդանիների կենդանի բջիջներ՝ դրանց հետագա կլոնավորման համար։

Առաջին հերթին հետազոտողներն ակնկալում են վերակենդանացնել մամոնտներին։

Նախագիծը կյանքի կոչելու համար իրենց մասնագիտական ուժերն են միավորել Հյուսիս-արևելյան դաշնային համալսարանը, Sooam կենսատեխնոլոգիական ուսումնասիրությունների հարավկորեական հիմնադրամը և Պեկինի մոլեկուլային գենետիկայի ինստիտուտը։

Լաբորատորիայի մասնագետները պատրաստվում են հայտնաբերված մնացորդներում գտնել այնպիսի բջիջներ, որոնք դեռ կենդանի են և լավ պահպանված, որից հետո դրանց կլոնավորման համար հատուկ տեխնոլոգիա պետք է մշակվի և իրականացվի կենդանու կլոնավորումը։