Եղանակն՝ այսօր
Սևանի ավազանում պեղվել է առաջին բնակավայրերից մեկը, որը կարևոր նշանակություն ունի. Աշոտ Փիլիպոսյան
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ տնօրենի գիտական աշխատանքների գծով տեղակալ Աշոտ Փիլիպոսյանը և «Էրեբունի» պատմահնագիտական արգելոց-թանգարանի «Կարմիր բլուր» մասնաճյուղի վարիչ, Օձաբերդի հայ-իտալական արշավախմբի համաղեկավար Միքայել Բադալյանը այսօր մամուլի ասուլիսին ներկայացրեցին Օձաբերդի պեղումների արդյունքները, որոնք վերաբերում են 10-6-րդ դդ. նախաուրարտական, ուրարտական և հետուրարտական նոր շերտերի բացահայտմանը:
Բանախոսները նշեցին, որ այն Սևանի հարավային ավազանում առաջին բնակավայրերից մեկն է, որը պեղվել է: Մասնավորապես, Աշոտ Փիլիպոսյանը նշեց, որ Օձաբերդի հուշարձանը վաղուց հայտնի էր և մեծագույն հնագետները փորձել են այնտեղ պեղումներ կատարել, սակայն միայն անցած տարի բնակավայրի ծավալուն պեղումներ են իրականացվել, որը շարունակվում է այս տարի:
Ըստ նրա՝ այս պեղումները իսկապես շատ կարևոր դեր ունեն պատմամշակութային իրողությունների մեկնաբանության կապվածության հարցերը պարզելու համար: «Ես շատ ուրախ եմ արդյունքներից և կարող եմ ասել, որ պեղումները ամենաբարձր մակարդակով են արվում»,- ասաց նա՝ ավելացնելով, որ բնակավայրի հասարակությունը հիմնականում նստակյաց է եղել, ունեցել է մշակութային կապեր:
Միքայել Բադալյանը նշեց, որ Օձաբերդը Սևանի հարավային ավազանի ուրարտական ամենամեծ ամրոցներից մեկն է և հենակետի դեր էր կատարում:
«Այսինքն՝ այն եղել է ռազմավարական նշանակություն ունեցող բնակավայրերից մեկը: Մեզ համար այս տեղանքի ընտրությունը շատ կարևոր էր, որովհետև բնակավայրեր շատ քիչ են ուսումնասիրված »,- ասաց նա և նշեց, որ ուսումնասիրությունները շարունակվում են և հիմա իրականացվում են հնաբուսական, հնակենդանաբանական ուսումնասիրություններ։
Միքայել Բադալյանը նշանակալի արդյունք համարեց այն, որ արդեն ֆիքսվել են բնակավայրի մի հատվածը, բացվել են հետուրարտական ժամանակաշրջանի երկու սենյակներ, որոնք երկշերտ ամուր պատեր ունեն: «Հստակ կարող ենք ասել, որ հետուրարտական շրջանում թե՛ միջնաբերդում, թե՛ ամրոցում կյանքը շարունակվել է»,-ասաց նա:
Studio One