Ցուկերբերգը ներկայացրել է Facebook-ում «լայք» կոճակի ընդլայնված հնարավորությունները (տեսանյութ)

10:46 • 09.10.15

Facebook սոցիալական ցանցի հիմնադիր Մարկ Ցուկերբերգը ներկայացրել է «լայք» կոճակի ընդլայնված հնարավորությունները՝ սոցցանցի իր էջում տեսանյութ տեղադրելով։

«Ծանոթացեք նոր արձագանքների հետ»,- գրել է Ցուկերբերգը տեսանյութի տակ, որը պատկերում է տարբեր հույզեր արտահայտող սմայլեր։

Ավելի վաղ հաղորդվել է, որ Facebook սոցիալական ցանցը պատրաստվում է ընդլայնել «լայք» կոճակի հնարավորությունները:

«Լայքի» նոր տարբերակը կստանա «Արձագանքներ» (Reactions) անվանումը և իրենից կներկայացնի սմայլերի շարք, որոնք տարբեր հույզեր են արտահայտում։ Այդկերպ սոցիալական ցանցը պատրաստվում է լսարանին հնարավորություն տալ ավելի էմոցիոնալ արձագանքել լրահոսում հրապարակումներին։ Հին «լայքն», ընդ որում, կպահպանվի, բայց կլրացվի սմայլիկներով, որոնք սեր, ծիծաղ, ժպիտ, զարմանք և զայրույթ են արտահայտում։

Իսպանիայից և Իռլանդիայից Facebook-ի օգտատերերը կկարողանան փորձարկել նոր հնարավորությունը թեստային ռեժիմով արդեն հոկտեմբերի 9-ին՝ ուրբաթ օրը։