Չինաստանում կենդանիների կլոնավորման խոշորագույն գործարան կկառուցեն

Չինաստանի Տյանցզին  նահանգում մտադիր են կառուցել կենդանիների կլոնավորման ամենամեծ գործարանն աշխարհում: BBC-ի հաղորդմամբ` այս մասին հայտնել են նահանգի տնտեսական և տեխնիկական զարգացման հանձնաժողովից:

Ձեռնարկությունը, որի կառուցման համար 200 մլն յուան (31.3 մլն դոլար) կներդրվի, կներառի լաբորատորիան, կենդանիների կլոնավորման կենտրոնը, «գենետիկ բանկը» և  ցուցասրահը:

Ինչպես նշվում է` հիմնական շենքի կառուցումն արդեն սկսվել է:  Կլոնավորման ենթակա կենդանիների շարքում են ծառայողական և ընտանի շները, կովերը և մրցարշավային ձիերը:

Ենթադրվում է, որ գործարանի արտադրության մի մասը կհանվի վաճառքի:

Չինաստանում  կենդանիների կոմերցիոն կլոնավորմամբ զբաղվող առաջին գործարանը ստեղծվել է 2014-ին, որի առաջին արտադրանքն է եղել տիբեթյան «մաստիֆ» ցեղատեսակի 3 զտարյուն շունը: