Amazon-ը ցուցադրել է առաքումների համար նախատեսված անօդաչուն (տեսանյութ)

13:33 • 02.12.15

Առցանց առևտրով զբաղվող Amazon ընկերությունն առաջին անգամ ցուցադրել է անօդաչու թռչող սարքի այն մոդելը, որի միջոցով իրականացնելու է գնված իրերի առաքումը:

Ինչպես նշում է Al Arabiya-ն, հրապարակված տեսանյութում ներկայացվում է, թե ինչպես է սարքն Amazon-ի պահեստից վերցնում առաքման համար նախատեսված իրն ու հնարավորինս արագ տեղ հասցնում այն։

Հետաքրքրական է, որ անօդաչուն պատվերը կկարողանա առաքել առցանց տիրույթում տվյալ իրը գնելուց հետո ընդամենը 30 րոպեի ընթացքում:

Ըստ ընկերության ներկայացուցիչների՝ սարքն առավելագույնը կարող է հաղթահարել 24 կմ հեռավորություն` երկրի մակերևույթից գտնվելով 122 մ բարձրության վրա: