Մենդելեևի աղյուսակի 113-րդ տարրը կարող է կոչվել «ճապոնիում»

Մենդելեևի աղյուսակի 113-րդ քիմիական տարրի ստեղծման հարցում առաջնահերթությունը, ամենայն հավանականությամբ, տրվելու է ճապոնական RIKEN ինստիտուտի գիտնականներին, տարրը նախատեսվում է կոչել «ճապոնիում»։

Ինչպես տեղեկացնում է РИА Новости գործակալությունը, այսօր հայտնի է դարձել, որ աղյուսակի 113-րդ տարրի հեղինակային իրավունքի հրապարակումը տեղի կունենա հունվարի վերջին:

Տեսական ու կիրառական քիմիայի միջազգային միության (IUPAC) և Տեսական ու կիրառական ֆիզիկայի միության (IUPAP) ներկայացուցիչներից բաղկացած աշխատանքային խումբը IUPAC-ին  ներկայացրել է հեղինակային իրավունքի հարցն ու եզրակացությունները, համաձայն որի նոր տարրի հեղինակային իրավունքները պետք է պատկանեն RIKEN-ին:

Վերջնական որոշման կայացման համար, որը տեղի կունենա հունվարին, պետք է, որ միությունը համաձայնի միացյալ աշխատանքային խմբի եզրակացություններին:

Եթե Ճապոնացի գիտնականները ճանաչվեն նոր տարրի ստեղծողներ, ապա, հավանաբար, այն կկոչվի «ճապոնիում»: Այն կլինի առաջին «ճապոնական» տարրը Մենդելեևի աղյուսակում: