BMW-ն ցուցադրել է ինքնակառավարվող ռոդսթերի նախատիպը (լուսանկարներ)

BMW ընկերությունը 2016-ի Սպառողական էլեկտրոնիկայի միջազգային ցուցահանդեսում ներկայացրել  է i Vision Future Interaction  ինքնակառավարվող մեքենայի նախատիպը:

Ինչպես գրում է Motor.ru-ն` նորույթը, որը կառուցվել է i8 Spyder կոնցեպտային ռոդսթերի հիման վրա, կոչված է ցուցադրելու, թե ինչպիսի տեսք կունենա ավտոմատ կառավարման համակարգով աշխատող մեքենայի ինտերիերը:

Կոնցեպտային մոդելն ստացել է նոր սերնդի պրոյեկցիոն էկրան, որը տեղեկություն է ցուցադրում շարժման արագության, արագության սահմանափակումների, ճանապարհի պայմանների և նավիգացիոն տվյալների մասին:

Մեջտեղի հատվածում հատուկ սենսորներ են տեղադրված, որոնք կարող են տարբերակել ձեռքի տարբեր շարժումներ, այդ թվում` կոճակը սեղմելուն նմանակող շարժումը:  

BMW i Vision Future Interaction մոդելը  3 ռեժիմով է աշխատում` Pure Drive, Assist Mode և Auto Mode: Առաջին դեպքում կառավարման համար պատասխանատու է միայն վարորդը, երկրորդի դեպքում` օժանդակող համակարգեր կան, որոնք օգնում են խուսափել բախումից:  Երրորդն ամբողջությամբ ավտոմատ ռեժիով աշխատանքն է: