Գիտական ու տեխնոլոգիական առաջընթացը մարդկության գոյության մեծագույն սպառնալիքն է. Սթիվեն Հոքինգ

Աշխարհի առաջատար գիտնականներից մեկը՝ Սթիվեն Հոքինգը, կանխատեսել է, որ ներկայիս աննախադեպ գիտական ու տեխնոլոգիական առաջընթացը Երկրի վրա մարդկության գոյությանն ուղղված ամենամեծ սպառնալիքն է:

Ինչպես նշում է The Guardian-ը, ըստ գիտնականի՝ առաջիկա հազարամյակների ընթացքում Երկրի վրա տեղի կունենա մարդու գործունեության հետ անմիջականորեն կապված տեխնածին աղետ։

Հոքինգի կարծիքով՝ դեպքերի նման զարգացման պարագայում մարդկությունը ստիպված կլինի բնակության մեկ այլ  վայր գտնել` մյուս մոլորակների վրա։ Միևնույն ժամանակ, նա հավելել է, որ արտերկրային գաղութների հիմնումն իրականություն չի դառնա առաջիկա հարյուրամյակների ընթացքում:

Բրիտանացին մանրամասնել է նաև, որ ներկայում մարդկության համար մեծագույն վտանգ են ներկայացնում միջուկային զենքերն ու գենետիկորեն ձևափոխված վիրուսները։

«Բնականաբար, մարդկությունը չի դադարի առաջընթաց ունենալ, ուստի՝ մենք պետք է քաջ գիտակցենք դրա բերած վտանգներն ու վերահսկենք դրանք»,- նշել է 74-ամյա գիտնականը։