Սոցցանցերում գովազդվում է խոզի գրիպի դեմ դեղամիջոց, որի ներդիր թերթիկում այդ մասին ոչինչ չի նշվում

«Ֆեյսբուք» սոցիալական ցանցում  վերջին օրերին  լայնորեն գովազդվում է  «Ինֆլյուցիդ» դեղամիջոցը՝  որպես՝  «ապացուցված ազդեցություն H1N1 վիրուսի (խոզի գրիպ)  վրա , մինչդեռ դրա  երաշխավորված տարբերակի կից ներդիր-թերթիկից  տեղեկանում ենք, որ այն ցուցված է վերին շնչառական ուղիների վիրուսային  սուր  ինֆեկցիաների և գրիպի դեմ:

Գովազդում նաև հավելվում է. «Արդյունավետ կանխարգելում և բուժում ամբողջ ընտանիքի համար: Հարցրեք դեղատներում...»:

Tert.am -ը հարցի առնչությամբ, թե արդյո՞ք սա խաբեություն չէ, զրուցեց  ՀՀ ԱՆ Դեղերի և բժշկական տեխնոլոգիաների փորձագիտական կենտրոնի տնօրեն Հակոբ Թոփչյանի հետ, ով, սակայն, ասաց. «Չի նշում՝  խոզի գրիպի դեմ է, գրում է գրիպանման.  ինքը հոմեպատիկ պրեպարատ է, գերմանական, գրիպի ժամանակ ցուցված է որպես հակավիրուսային, հակաբակտերիալ ազդեցությամբ օժտված դեղ»:

Այսինքն` յուրաքանչյուր թերապևտ սովորական գրիպի դեմ իր հայեցողությամբ կարող է նշանակել այս պրեպարատը:

Տեղեկացնենք, որ գովազդներից մեկում, որի լուսանկարը պահպանված է,  նշվում է, որ խոզի գրիպի դեմ է։

Տեղեկանալով, որ սոցցանցերի գովազդներում դա գովազդվում է որպես խոզի գրիպի դեմ դեղամիջոց, Հակոբ Թոփչյանը նկատեց` «Դե ինչ անեմ, սոցցանցերում ինչ ասես գրում են»: