Չինացիները 1044 ձիաուժ հզորությամբ հիպերքար են ստեղծել, որը 100 կմ/ժամ-ը հաղթահարում է 2.5 վայրկյանում (լուսանկարներ)

TechRules  չինական ընկերությունը Ժնևի ավտոսրահում ներկայացրել է TREV  (Turbine-Recharging Electric Vehicle)  «տուրբոէլեկտրական» հիպերքարի նախատիպը, որը զինված է 1044 ձիաուժ զարգացնող ուժային համակարգով: 

Նորույթը ներկայացվել է երկու տարբերակով` մրցարշավային AT96 (Aviation Turbine) և ճանապարհային GT96 (Gas Turbine): Սուպերքարում միկրո տուրբոգեներատորի հատուկ համակարգ են կիրառել, որն էլեկտրաէներգիա է ստեղծում լիթիում-իոնային մարտկոցները վերալիցքավորելու համար:

Ինչպես հայտնում է Motor.ru-ն` մարտկոցները 6 էլեկտրաշարժիչ են սնում, որոնցից մեկական ագրեգատ տեղադրել են առջևի անիվներում, ևս 2-ական` հետևի անիվներում:   Ընդհանուր հզորությունը կազմում է 1044 ձիաուժ:

AT96-ի միկրոտուրբինը կարող է աշխատել ավիացիոն կերոինով, դիզելով կամ բենզինով, իսկ  GT96-ը հարմարեցված է գազով կամ կենսագազով աշխատելուն:

Միայն էլեկտրական ուժով մեքենան կարող է անցնել 150 կմ, իսկ ամբողջությամբ լիցքավորված բաքով, որի տարողությունը 80 լիտր է,  1930 կմ:  100 կմ/ժամ-ը մեքենան զարգացնում է 2.5 վայրկյանում, իսկ առավելագույն արագությունը 350 կմ/ժամ է: