Իրականում շապիկիս տակ եղել է պաստառ, որը ոստիկանները բերման ենթարկելուց հետո են գտել. Շահեն Հարությունյան (տեսանյութ)

«Ցեղակրոն» կուսակցության ղեկավար Շանթ Հարությունյանի որդու՝ Շահեն Հարությունյանի վերնաշապիկի տակ իրականում պաստառ է թաքցված եղել, երբ Գյումրիի Վարդանանց հրապարակում Հռոմի պապի կողմից Սուրբ պատարագ մատուցելուց առաջ նրան բերման են ենթարկել, բայց դա ոստիկանները նկատել են միայն բերման ենթարկելուց հետո։

Այս մասին այսօր լրագրողների հետ զրույցում ասաց ինքը՝ Շահեն Հարությունյանը՝ նշելով, որ ոստիկանության տարածած հաղորդագրությունը չի համապատասխանում իրականությանը, թե ոստիկանները նկատել են Շահեն Հարությունյանին՝ վերնաշապիկի մեջ իր թաքցնելիս։

«Ոստիկանները մոտեցել են, ասել՝ դուրս արի երթևեկելի գոտուց, դուրս չեմ եկել, բայց ի՞նչ երթևեկելի գոտու մասին է խոսքը, եթե ամբողջ Գյումրին փակ է»,- իր ու ոստիկանների միջև տեղի ունեցածը պատմեց նա։

Ոստիկանությունը նրա նկատմամբ վարչական վարույթ է հարուցել ոստիկանի օրինական պահանջներին չենթարկվելու համար։

Երիտասարդը նշեց, որ ոչինչ չի կարող խոչընդոտել իր քաղաքացիական պայքարին, իսկ պաստառի վրա գրված է եղել «Ազատություն Շանթ Հարությունյանին և Հայաստանի բոլոր քաղբանտարկյալներին», որը նա ցանկացել է Հռոմի պապին ցույց տալ։