Ջրասուզորդները Մեծ արգելախութում առողջ մարջանով առեղծվածային փոս են հայտնաբերել (լուսանկարներ)

Ջրասուզորդներն Ավստրալիայի հյուսիս-արևելյան ափից 200 կմ հեռավորության վրա՝ Մեծ արգելախութում, հայտնաբերել են ահռելի կապույտ փոս, որի մասին դեռևս շատ քիչ տեղեկություն կա, գրում է dailymail.co.uk-ը։

Փոսի գլխավոր առանձնահատկությունն այն է, որ անկախ Մեծ արգելախութում մարջանի զանգվածային գունաթափումից՝ դրանում մարջանի գաղութները նորմալ պահպանվել են ու միանգամայն առողջ են: Այս հայտնագործությունն իսկական անակնկալ է դարձել գիտնականների համար, որոնք չափազանց մտահոգված են 2016թ. ի վեր մարջանի զանգվածային գունաթափման փաստով:

Հայտնի է, որ ծովային կենսաբաններն ու ջրասուզորդները փոսն ուսումնասիրելու համար շատ չեն իջել՝ ընդամենը 20 մ, մինչդեռ փոսը ձգվում է ծովի հատակից էլ ներքև:

«Այնքան երջանիկ էինք այնտեղ տեսնել մարջանի մեծ, առողջ խութեր»,-նշել է մասնագետ Ջոնի Գասկելը:

Ծովային կենսաբաններն այժմ լուրջ մտահոգություններ ունեն առ այն, թե արդյոք Մեծ արգելախութին կհաջողվի վերապրել գլոբալ տաքացման երևույթը: Հայտնի է, որ տաք ջրային հոսանքների հետևանքով մարջանը կորցնում է կենսական նշանակություն ունեցող նյութերն ու գունաթափվում: Դրա հետևանքով միլիոնավոր ծովային բնակիչներ չեն կարողանում ձվադրել ու բնակվել մարջանային խութերում:

Գունաթափումը կարող է տևել է 6 շաբաթ, բայց եթե ջրի ջերմաստիճանը նվազի, մարջանը կրկին կվերականգնվի: Սակայն շատ դեպքերում մարջանը չի վերականգնվում:

Ստորև ֆոտոշարքով ներկայացված են մարջանի գունաթափման հետևանքները.