55 000 տուն՝ հինգ կամուրջի վրա. ինչպիսին կլինի Մոսուլը, եթե 3D տպագրության շնորհիվ վերականգնվի (լուսանկարներ)

Բելգիացի ճարտարապետ Վինսենթ Կալեբաութը, որը հույս ունի վերակառուցել Իրաքյան Մոսուլը, 3D տպագրության եղանակով կառուցվելիք կամուրջների մի շարք նախագծեր է ներկայացրել, որոնց շնորհիվ հնարավոր է քաղաքը վերականգնել՝ որպես շինանյութ օգտագործելով հենց տեղի ավերակները:

Ինչպես ներկայացնում է Daily Mail-ը, նրա ներկայացրած նախագիծը, որը հաղթող է ճանաչվել «Վերականգնելով Իրաքի ազատագրված տարածքները» մրցույթում, իրենից ներկայացնում է 3D տպագրված կամուրջների և բնակելի շենքերի համակարգ, որոնք տեղակայվում են Տիգրիս գետի շրջակայքում:

Հինգ 3D տպիչ կարող է օրական 30 տուն կառուցել 5 տարբեր կամուրջի վրա կամ շուրջ 55 000 բնակելի համալիր հինգ տարում:

Իրաքի՝ մեծությամբ երկրորդ քաղաքը «Իսլամական պետությունից» ազատագրվել է այս տարվա հուլիսին ամիսներ տևած պայքարի արդյունքում:

Շուրջ 10000 շինություն է ավերվել քաղաքում, մեծամասնությունն՝ արևմտյան Մոսուլում: