«Կասպերսկու լաբորատորիան» հայտնաբերել է «ВКонтакте»-ի՝ այդ թվում նաև հայ օգտատերերի տվյալները գողանալու համար օգտագործվող հավելվածները

«Կասպերսկու լաբորատորիայի» փորձագետները հայտնել են, որ հայտնաբերել են հավելվածներ, որոնք օգտագործվել են հետխորհրդային տարածքի երկրներում «ВKонтакте» սոցցանցի օգտատերերի տվյալները գողանալու համար, հայտնում է Ведомости-ն:

Ընկերության տվյալներով՝ ամենատարածված հավելվածը Mr. President Rump բջջային խաղն է, այն ներբեռնվել է ավելի քան 1 միլիոն անգամ:

Չարագործները հաշվի են առել սոցցանցի լսարանի յուրահատկությունները։ Խաղը տարածված է նախևառաջ հետխորհրդային տարածքում, այդ պատճառով հավելվածը տվյալներ է գողացել միայն որոշակի լեզուներով՝ ռուսերենով, բելառուսերենով, ուկրաիներենով, ղազախերենով, հայերենով, ադրբեջաներենով, ղրղզերենով, ռումիներենով, տաջիկերենով և ուզբեկերենով սարքերից, հայտնել է լրատվամիջոցը՝ վկայակոչելով ընկերությանը:

Google Play-ն արդեն հեռացրել է 85 հավելված, իսկ «ВKонтакте»-ի մամուլի ծառայության ղեկավար Եվգենի Կրասնիկովը խորհուրդ է տվել չօգտագործել կասկածելի ծրագրեր և այնտեղ չլրացնել սոցցանց մուտքի համար տվյալներ: