Երկրի մոտ նկատվել է «անտեսանելի» աստերոիդ. ՆԱՍԱ

ՆԱՍԱ-ն (Օդագնացության և տիեզերական տարածության հետազոտությունների ազգային գործակալություն) նախազգուշացրել է աստերոիդի մասին, որը մեծ արագությամբ մոտենում է Երկիր մոլորակին: Այս մասին հայտնում է Express.co.uk-ը:

Գիտնականների համաձայն՝ 2017 YZ4 կոչվող տիեզերական մարմինը շարժվում է մոտավորապես 33 հազար կմ/ժ արագությամբ:

The Daily Mail-ը գրում է, որ գիտնականներին հաջողվել է նկատել տիեզերական մարմինը միայն վերջերս. այն «թաքնվել է» աստղագետներից մինչև դեկտեմբերի 25-ը:

Աղբյուրի հաղորդմամբ՝ աստերոիդը բացահայտել են ԱՄՆ-ի Արիզոնա նահանգի Լեմոն լեռան վրա գտնվող աստղադիտարանի աշխատակիցները:

ՆԱՍԱ-ի տվյալների համաձայն՝ նոր աստերոիդը չի կարելի հսկայական անվանել, քանի որ դրա տրամագիծն ընդամենը 7-15 մետր է: Այնուամենայնիվ, Երկրի օդային թաղանթ ընկնելու դեպքում այն կարող է կործանարար հետևանքների հանգեցնել:

Գիտնականների հաշվարկները վկայում են, որ «անտեսանելի» աստերոիդը գտնվում է Երկրից ընդամենը 224.000 կիլոմետր հեռավորության վրա: Այս հեռավորությունը փոքր է համարվում։