Հնդկուհին բռնաբարության փորձը կանխող վարտիք է ստեղծել՝ համալրված GPS-ով ու տեսախցիկով (լուսանկարներ, տեսանյութ)

Հնդկաստանի բնակչուհի Սինու Կումարին երկրում կանանց բռնաբարությունների թիվը նվազեցնելու ուշագրավ տարբերակ է առաջարկել։

Ինչպես նշում է The Daily Mail-ը, Ուտար Պրադեշ նահանգի բնակչուհին ստեղծել է վարտիք, որը համալրված է  «կողպեքով», հարձակվողի դեմքը ֆիքսելու համար տեսախցիկով, ինչպես նաև ոստիկանությանը հարձակման մասին ահազանգելու հնարավորությամբ։

Հնարամիտ հնդկուհին պատմել է, որ վարտիքը ստեղծելու համար ծախսել է մոտ 70 դոլար, և հույս ունի, որ կկարողանա սկսել դրա զանգվածային արտադրությունը։

Դրա վրա կա հատուկ կոճակ, որը սեղմելու դեպքում վարտիքն անհնար է հանել։ Բացի այդ, այն զրահապատ է ու չի կարող կտրվել դանակի կամ մկրատի օգնությամբ։

Կումարիի խոսքով՝ սեռական բնույթի ոտնձգությունները, բռնաբարությունն ու մանկապղծությունն իրենց նահանգում տարածված երևույթներ են, ուստի՝ վարտիքը կարող է ինչ-որ չափով պաշտպանել իգական սեռի ներկայացուցիչներին։

«Ես վարտիքի վրա խելացի կողպեք եմ տեղադրել, որը հնարավոր է բացել միայն գաղտնաբառի միջոցով։ Բացի այդ, դրա վրա GPS-ով համալրված սարք կա, որը հարձակման դեպքում կարող է ահազանգող հաղորդագրություն ուղարկել ոստիկանությանը։ Պարտադիր չէ, որ կանայք ու աղջիկներն այս վարտիքն անընդհատ կրեն։ Նրանք կարող են այն կրել միայն տնից միայնակ դուրս գալու կամ վտանգ ներկայացնող միջավայրում գտնվելու դեպքում»,-պատմել է հնդկուհին։

Աղբյուրը մանրամասնում է, որ այժմ վարտիքի նախնական օրինակն ուղարկվել է Նորարարությունների ազգային հիմնադրամ, որպեսզի արտադրության համար անհրաժեշտ արտոնագիր տրամադրվի։