«Ֆորմուլա-1»-ի կազմակերպիչները հրաժարվել են «շոուի թագուհիներից» (լուսանկարներ)

«Ֆորմուլա-1» հեղինակավոր ավտոմրցաշարի կազմակերպիչները նոր մրցաշրջանում կհրաժարվեն շոուին մասնակցող աղջիկներից, որոնք մրցարշավների ժամանակ ուղեկցում են ավտոմրցարշավորդներին, մասնակիցների գլխավերևում պահում են արևապաշտպան հովանոցներ, հանձնում են մրցանակներ և պարզապես իրենց ներկայությամբ զարդարում են դիտարժան շոուն:

Ինչպես նշում է motor.ru-ն, «Ֆորմուլա-1»-ի կոմերցիոն տնօրեն Շոն Բրատչեսը մանրամասնել է, որ «շոուի թագուհիները» տասնամյակներ շարունակ եղել են F1-ի առանցքային բաղադրիչներից մեկը, որը, սակայն, այլևս չի համապատասխանում ավտոմրցաշարի ապագայի վերաբերյալ իրենց տեսլականին:

Բրատչեսը շեշտել է, որ աղջիկների ներկայությունն այլևս հակասում է ժամանակակից սոցիալական նորմերին:

«Կարծում ենք, որ նման պրակտիկան տեղին չէ «Ֆորմուլա-1»-ի համար»,- հավելել է ղեկավարը:

Աղբյուրը հավելում է, որ 2015թ. «Ֆորմուլա-1»-ի՝ Մոնակոյում կայացած Գրան պրիի ժամանակ աղջիկների փոխարեն տղա մոդելներ են դուրս եկել, ինչը խիստ քննադատության էր ենթարկվել: