Գերմանական դատարանը վճռել է, որ խոշոր քաղաքները դիզելային շարժիչներով ավտոմեքենաներն արգելելու իրավունք ունեն

Գերմանիայի դաշնային վարչական դատարանը վճռել է, որ խոշոր քաղաքներն իրավունք ունեն արգելելու դիզելային շարժիչներով ավտոմեքենաները, հայտնում է Reuters գործակալությունը:

Վնասակար արտանետումների վերաբերյալ աղմուկը բարձրացել է 2015 թվականին, երբ Volkswagen ավտոարտադրողը խոստովանել էր, որ կեղծել է արտանետումների մակարդակի վերաբերյալ ամերիկյան թեստերը, որոնց նպատակն է եղել սահմանափակել շնչառական հիվանդությունների պատճառ հանդիսացող ազոտի օքսիդների արտանետումները:

Օդի վատ որակի առնչությամբ դատական հայցով հանդես էր եկել բնապահպանական DUH կազմակերպությունը՝ հայցը ներկայացնելով Շտուտգարտ և Դյուսելդորֆ քաղաքների դեմ՝ նրանց արգելքներ սահմանել պարտադրելու համար: Բնապահպանները հաղթել են գործն առաջին ատյանի դատարաններում՝ հասնելով քաղաքային իշխանությունների համար դիզելային շարժիչներով ավտոմեքենաներն արգելելու իրավունքին:

Գերմանիայի դաշնային շրջանները բողոքարկել են դատարանի վճիռը, ինչից հետո գործը փոխանցվել է Լայպցիգում դաշնային վարչական դատարան, որն էլ այսօր վճռել է, որ արգելքներն օրինական են:

Մինչ այլ երկրներում նույնպես քնարկվում է դիզելային ավտոմեքենաների նկատմամբ սահմանափակումները, ժամանակակից ավտոմոբիլային արտադրության հայրենիքում նման արգելքը մեծ հարված է ավտոարտադրման արդյունաբերության համար և պարտություն կանցլեր Անգելա Մերկելի կառավարության համար, որը դեմ էր հանդես գալիս նման արգելքներին, գրում է Reuters-ը: