Google-ը սխալմամբ արգելել է «Գնումներ» ծառայությունում «զենք» բառը պարունակող որևէ ապրանք փնտրել

«Google գնումներ» ծառայության որոնման համակարգում կորել են անվանման մեջ «զենք» բառի հիշատակմամբ ապրանքները՝ ընդհուպ ջրային հրացաններն ու ապրանքներ, որոնց անվանումներում հիշատակվում են Sex Pistols կամ Guns N’Roses խմբերը: Այդ մասին հայտնում է Business Insider-ը:

Ինչպես ավելի ուշ Twitter-ի իր էջում պարզաբանել է Google-ը, համակարգում խափանում է տեղի ունեցել:

«Սխալ է տեղի ունեցել «Գնումներ» ծառայության որոնման արդյունքներում, և մենք աշխատում ենք այդ հարցը լուծելու ուղղությամբ»,- նշել է ընկերությունը՝ հավելելով, որ իր քաղաքականությունում փոփոխություններ տեղի չեն ունեցել:

«Google գնումներ» ծառայությունն արգելել է զենքերը որոնման արդյունքներից 2012 թվականից: