Ցուկերբերգն ու նրա կինը 30 մլն դոլար կհատկացնեն գրագիտության ցածր մակարդակի դեմ պայքարի համար

Facebook ընկերության հիմնադիր Մարկ Ցուկերբերգն ու նրա կինը՝ Պրիսցիլա Չանը, 30 միլիոն դոլար կնվիրաբերեն Հարվարդի համալսարանին և Մասաչուսեթսի տեխնոլոգիական ինստիտուտին՝ ցածր դասարանների աշակերտների շրջանում գրագիտության ցածր մակարդակի դեմ պայքարելուն ուղղված նախաձեռնության համար: Այդ մասին հայտնում է The Boston Globe-ը:

Ինչպես նշում է պարբերականը, Reach Every Reader («Հասիր յուրաքանչյուր ընթերցողին») անվանումով նախաձեռնությունը նախատեսված է հինգ տարվա համար:

Դրա շրջանակում համալսարանները պատրաստվում են ստեղծել ցանցային գործիք, որը թույլ կտա որոշել այն ուսումնական հաստատությունները, որոնց աշակերտներն առավել շատ բարդություններ են ունենում ընթերցանության ժամանակ, և պարզել, թե որն է դրա պատճառը, ինչպես նաև առաջարկել մեթոդներ, որոնք կկարողանան կիրառել ուսուցիչներն ու ծնողները երեխաների ընթերցանության հմտություններն ուժեղացնելու համար: