Աշխարհի խոշորագույն աստղադիտակը գործարկման պահից 11 նոր պուլսար է հայտնաբերել

Չինական FAST ռադիոաստղադիտակը (Five hundred meter Aperture Spherical Telescope), որը ներկայում խոշորագույնն է աշխարհում, գործարկման պահից 11 նոր պուլսար է հայտնաբերել: Այս մասին հայտնում է Չինաստանի պետական աստղադիտարանը:

China Daily-ի հաղորդմամբ՝ 2016 թվականի սեպտեմբերին գործարկվելուց հետո այն հայտնաբերել է 51 աստղ, որոնք իրենց բնութագրերով նման են պուլսարների, և դրանցից 11-ը հաստատվել են որպես նոր պուլսարներ՝ այլ երկրների աստղադիտարանների կողմից:

Պուլսարները (ռադիոճառագայթման բաբախող աղբյուրներ) իմպուլսային էլեկտրամագնիսական ճառագայթման տիեզերական աղբյուրներ են:

Այս պահին FAST ռադիոաստղադիտակը Չիաստանի ամենաթանկարժեք աստղագիտական ծրագիրն է. այն իրականացնելու համար բյուջեից ծախսվել է 1.2 միլիարդ յուան (180 միլիոն դոլար):