Facebook-ի տեղեկատվական անվտանգության ղեկավարը հեռանում է պաշտոնից

Facebook-ի տեղեկատվական անվտանգության ղեկավար Ալեքս Ստամոսն իր պաշտոնից կհեռանա օգոստոսին: Այդ մասին հայտնել է The New York Times-ը:

Facebook-ի ղեկավարությունը չի եկել միաձայն որոշման, թե արդյոք ընկերությունը պետք է բացահայտի սոցիալական ցանցի աշխատանքում պետության միջամտության փորձերի և դրա հնարավորությունները չարաշահելու մասին տեղեկությունները: Ստամոսը հանդես էր գալիս նման տեղեկությունների մեծ մասը հրապարակելու օգտին: Բացի այդ, նա նախատեսում էր իր ստորաբաժանման վերակազմակերպում՝ չարաշահումներին ավելի արդյունավետ հակազդելու համար:

Նա ցանկանում էր ընկերությունից հեռանալ մոտ ժամանակներս, սակայն ղեկավարությունը նրան համոզել է ևս կես տարի աշխատել:

Անցած շաբաթ ընկերությունն արգելափակել է սոցցանցում Cambridge Analytica բրիտանական վերլուծական ծառայությանը, որը նախընտրական ռազմավարություններ է մշակում, այդ թվում մշակել է նաև Դոնալդ Թրամփի նախընտրական արշավի համար:

Cambridge Analytica-ն հասանելիություն է ստացել 50 միլիոն օգտատերերի տեղեկատվությանը: