ՆԱՍԱ-ն հրապարակել է Ծովածոց միգամածության ուշագրավ լուսանկարները

ԱՄՆ-ի ազգային ավիատիեզերական գործակալությունը՝ ՆԱՍԱ-ն, հրապարակել է «Հաբլ» տիեզերական աստղադիտակի կողմից արված ուշագրավ լուսանկարներ, որոնք ներկայացնում են Աղեղնավորի համաստեղությունում գտնվող Ծովածոց միգամածությունը:

Ինչպես նշում է The Daily Mail-ը, լուսանկարները հրապարակվել են «Հաբլ»-ի գործունեության 28-ամյակի կապակցությամբ:

Աստղադիտակն ուշագրավ կադրերը ֆիքսել է Wide Field Camera 3 տեսախցիկի միջոցով՝ փետրվարին: Լուսանկարներն արվել են ինչպես ինֆրակարմիր, այնպես էլ տեսանելի լույսի միջոցով: Հայտնի է, որ ինֆրակարմիր լույսն անցնում է տիեզերական փոշու ու գազի միջով՝ հնարավորություն տալով տեսնել երիտասարդ աստղերի ձևավորումը:

ՆԱՍԱ-ի պնդմամբ՝ Ծովածոց միգամածությունն ահռելի մեծություն ունի, դրա լայնությունը 55, իսկ բարձրությունը 20 լուսային տարի է: Այն Երկրից գտնվում է 4.000 լուսային տարի հեռավորության վրա:

Միգամածության մութ ամպերի կենտրոնում գտնվում է «Հերշել 36» վառ աստղը, որն իոնացնող ճառագայթման հիմնական աղբյուրն է միգամածության այս հատվածի համար: Այն Արևից 32 անգամ ավելի մեծ է:

Միգամածություն են անվանում հսկայական, տաք ու լուսարձակող գազային ամպերը: Դրանք համարվում են ամենագեղեցիկ տիեզերական երևույթներից մեկը: Միգամածությունում ակտիվորեն նոր աստղեր են ձևավորվում: