Եղանակն՝ այսօր
Մոցարտ, Բախ, Պրոկոֆև. ռուս ֆլեյտահարուհին դասական երաժշտություն է նվագել գլխուղեղի վիրահատության ժամանակ (լուսանկարներ)
Ռուս ֆլեյտահարուհի Սոֆյա Պինաևան կատարել է դասական կոմպոզիտորներ Վոլֆգանգ Ամադեուս Մոցարտի, Յոհան Սեբաստիան Բախի ու Սերգեյ Պրոկոֆևի ստեղծագործություններ այն ժամանակ, երբ ավստրիացի վիրաբույժները վիրահատում էին իր գլխուղեղը: Այս մասին հայտնում է Kurier թերթը՝ մանրամասնելով, որ իրականացվում էր գլխուղեղի ուռուցքի հեռացման վիրահատություն:
«Լիարժեք գիտակցության պայմաններում վիրահատություն անելը՝ գլխուղեղի գործառույթները չխախտելով ուռուցքը հեռացնելու միակ հնարավորությունն է»,-պատմել է վիրաբույժ Գորդ ֆոն Կամպեն:
Նշվում է, որ այս տեսակի վիրահատության դեպքում հիվանդը դուրս է բերվում անզգայացումից ու մինչև երկու ժամ գիտակից վիճակում լինում:
«Այս փուլում մենք ստուգում ենք վիրահատվողի արձագանքները՝ գլխուղեղն էլեկտրական իմպուլսների միջոցով խթանելու ժամանակ: Հիվանդի հետ անմիջական կապը թույլ է տալիս մեզ փորձարկել գլխուղեղի այնպիսի կարևոր գործառույթներ, ինչպես, օրինակ, խոսելու ունակությունը»,-ընդգծել է նյարդավիրաբույժը:
Աղբյուրի հաղորդմամբ՝ 28-ամյա Պինաևայի դեպքում կարևոր էր պահպանել մանր մոտորիկան ու տեսողությունը, որպեսզի նա կարողանա շարունակել զբաղվել երաժշտությամբ ու լուսանկարչությամբ:
Վիրահատությունն անցկացվել է մի տարի առաջ, սակայն դրա մասին բարձրաձայնել են միայն այժմ:
«Միայն մի միջադեպ տեղի ունեցավ. նվագելու ժամանակ ես մի անգամ սխալվեցի», - պատմել է Պինաևան:
Studio One