Ամերիկյան ընկերությունը ստեղծել է սմարթֆոնի գերբարակ, նույնիսկ քամուց ճկվող էկրան

Ճկվող էկրանով սմարթֆոնների մասին խոսվում է 2013թ. ի վեր, սակայն շուկայի ներկայացուցիչները դեռևս վերջնական մոդել չեն ներկայացրել՝ սահմանափակվելով միայն  նախնական օրինակներով ու կոնցեպտներով:

Ինչպես նշում է cnet.com կայքը, ամերիկյան Royole տեխնոլոգիական ընկերության մասնագետներին հաջողվել է ստեղծել գերբարակ OLED էկրան՝ 0.01 մմ հաստությամբ, որը կարող է ճկվել ու թեքվել նույնիսկ քամուց:

Հատկանշական է, որ էկրանն այն աստիճան ճկուն է, որ այն հնարավոր է թևնոցի պես ծալել թևի շուրջ:

Ընկերությունը պատրաստվում է նորարարական սարքի շնորհանդեսը կազմակերպել հաջորդ շաբաթ՝ Բեռլինում մեկնարկելիք տեխնոլոգիական ցուցահանդեսի ժամանակ:

Հավելենք, որ ճկվող էկրանով սմարթֆոնի ստեղծման ուղղությամբ աշխատում են Samsung, Lenovo և LG ընկերությունները: