Տոկիոյում սկսվել են ուղևորներ տեղափոխող անվարորդ տաքսիների փորձնական ուղևորությունները

Տոկիոյում տարբեր նախագծերի շրջանակներում սկսվել են ուղևորներ տեղափոխող անվարորդ տաքսիների փորձնական ուղևորությունները: Այս մասին հայտնում է РИА Новости-ն:

Ճապոնիայի իշխանությունները մտադիր են գործարկել անվարորդ ավտոմեքենաները մինչև 2020 թվականին անցկացվելիք Պարալիմպիկ խաղերը:

Նշվում է, որ փորձնական ուղևորությունները կիրականացվեն մինչև սեպտեմբերի ութը: Հատկանշական է, որ իսկական ուղևորներով նման փորձնական ուղևորություններն առաջինն են աշխարհում:

Աղբյուրի հաղորդմամբ՝ ուղևորության երթուղին կանցնի Տոկիոյի ամենաբանուկ թաղամասերում՝ Օտեմատիում և Ռոպոնգիում: Ուղևորության ընդհանուր հեռավորությունը կլինի մոտ 5.3 կմ:

Փորձարկումների ընթացքում ուղևորներից բացի ավտոմեքենայում կլինեն վարորդն ու նրա օգնականը, որոնք արտակարգ իրավիճակի դեպքում իրենց ձեռքը կվերցնեն ղեկը:

Ենթադրվում է, որ անվարորդ տաքսով մի ուղղությամբ ուղևորությունը կարժենա մոտ 1.500 իեն (մոտ 13 դոլար) ու կիրականացվի սմարթֆոնի համապատասխան հավելվածի միջոցով: