Սիրով մանդատս կդնեի, եթե դա օգներ ԱԺ լուծարմանը, բայց սահմանադրական փոփոխությունից ու վարչապետի հրաժարականից բացի այլ տարբերակ չկա. Է. Մարուքյան

ԱԺ «Ելք» խմբակցության անդամ Էդմոն Մարուքյանը Tert.am-ի հետ զրույցում անդադառնում է այս օրերին «Ֆեյսբուք» սոցիալական ցանցերը ողողած ԱԺ-ի՝ առանց վարչապետի հրաժարականի լուծարման տարբերակներին, խոսում է նաև արտահերթ խորհրդարանական ընտրություններին «Լույս» դաշինքի հավակնությունների, կազմի ընդլայնման մասին:

-Պարո՛ն Մարուքյան, ԱԺ-ի լուծարման համար վարչապետի հրաժարականը, որն ամբողջությամբ պաշտպանում է ՔՊ-ն, շարունակում է ոչ միանշանակ գնահատականի արժանանալ ու թեժ քննարկման առարկա մնալ: Սոցցանցերում էլ ԱԺ լուծարման սահմանադրական, առանց հրաժարականի եղանակներ են առաջարկվում: Դրանցից են, որ բոլորը խմբակցությունները՝ գործող պատգաավորներով մանդատները վայր դնեն ՝ մինչև իրենց համապետական ցուցակների վերջին համար: Կամ՝ մեկ այլ օգտատեր առաջարկում էր, որպեսզի «Ելք» դաշինքի ընտրական ցուցակում ընդգրկված բոլոր թեկնածուները ԿԸՀ ներկայացնեն ինքնաբացարկի դիմումներ և ընտրական ցուցակը մնա դատարկ։ Այսօր 105 պատգամավորից կազմված ԱԺ ում կմնա 96 պատգամավոր և հնարավոր չի լինի լրացնել թափուր տեղերը։ Այս դեպքում ակնհայտ է Սահմանադրության 89-րդ հոդվածի 1-ին կետի խախտումը՝այն է ԱԺ պատգամավորների թիվը կլինի 101 –ից պակաս և ԱԺ-ն Սահմանադրության ուժով կհամարվի չձևավորված։ Քննարկվո՞ւմ են նման տարբերակներ:

-Իմ մանդատը ամեն րոպե պատրաստ եմ վայր դնել, եթե դա օգնի խորհրդարանը ցրելուն, բայց գոյություն ունի Սահմանադրություն, ընթացակարգեր և ակնհայտ է, որ եթե նման հնարավորություն լիներ, դա քննարկած կլինեինք ու դրա վերաբերյալ դիրքորոշում արտահայտած կլինեինք: Չկան այլ հնարավորություններ, բացի նրանցից, որոնք քննարկվել են՝ հրաժարականի ու Սահմանադրությունը փոփոխելու տարբերակները: Մնացած տարբերակները, որոնք այս օրերին «Ֆեյսբուքում» գրվում են, տարածվում են, շնորհակալ եմ մեր ակտիվ քաղաքացիներին, որ մտահոգված են ու տարատեսակ առաջարկներ են անում, բայց դրանք, ըստ էության՝ սիրողական բնույթ ունեն և սահմանադրական իրավունքի խորը վերլուծություն դրանց տակ չկա: Եթե լիներ, իրենց առաջարկած տարբերակներից որևէ մեկը կքննարկվեր: Ես հատուկ չեմ նշում, թե որ տարբերակը, որովհետև տարբեր գրառումներ են ուղարկում մեզ այս օրերին և ասում՝այս տարբերակով փորձեք, այն տարբերակով փորձեք:

-Իսկ հնարավո՞ր է, որ դրանք նաև ծուղակներ են պարունակում:

-Ամեն ինչ հնարավոր է, որովհետև ես գրողների մեջ չեմ տեսել ինչ-որ սահմանադրագետ կամ փորձագետ, ֆեյսբուքյան օգտատերեր են, անգամ պարզ էլ չի՝ իրական են, թե չէ: Հիմա, ամեն դեպքում, չէի ուզենա խախտել անմեղության կանխավարկածը: Մարդիկ են, առաջարկներ են անում, նորմալ է, շնորհակալ ենք, բայց գոյություն ունեցող ընթացարգերին ծանոթ ենք, չկան այլ հնարավորություններ:

-Ամեն դեպքում անհասկանալի է՝ ԱԺ լուծարման բանակցությունները վերսկվելո՞ւ են, թե՞ ոչ:

-Վերջին անգամ պայմանավորվել են, որ շփումները շարունակվելու են. անունը դրեք՝ բանակցություն, թե շփում:

-«Վերջին» ասելով նկատի ունեք հոկտեմբերի 2-ի դրությա՞մբ, թե ՞ դրանից հետո, երբ Գագիկ Ծառուկյանը խոսեց, մյուսները…

-Հոկտեմբերի 2-ի, Ծառուկյանի խոսելուց հետո վարչապետը մեկնել է Ֆրանսիա:

- Տեսեք՝ Դուք մի քանի անգամ ասել եք, որ «Կարթագենը պետք է կործանվի»՝նախկին իշխանության միջնաբերդը, այսուհանդերձ նրանք և, երևի թե, այլ ուժեր դեմ են: Հիմա՝ Ձեր գնահատմամբ՝ այդ վտանգները պահպանվո՞ւմ են և ի՞նչ պետք է արվի:

-Պետք է շատ զգույշ, շատ սթափ քայլեր կատարվեն, որոնք կտանեն խորհրդարանի արձակմանը և որի արդյունքում կկազմակերպվեն արտահերթ խորհրդարանական ընտրություններ:

-Երևանի ավագանու ընտրություններից հետո «Լույս» դաշինքի ավագանու անդամներից հայտարարել էին, որ ԱԺ ընտրություններին գնալու եք «Լույս» դաշինքով, այս հայտարարությունն ուժի մե՞ջ է:

-Դաշինքը գոյություն ունի, ստեղծված է, և հիմա նաև չենք բացառում ընդլայնման հնարավորությունը, որովհետև ակնհայտ է, որ մենք չենք մասնակցելու պարզապես 5-7 տոկոս ձայն տանելու համար, մենք 2-րդ ուժը դառնալու հավակնությամբ ենք մասնակցելու: Եվ մենք լինելու ենք Հայաստանում երկրորդ ուժը:

-Ո՞ր քաղաքական ուժի տեղն եք լրացնելու, մասնավորապես, կարծիքներ են հնչում, որ ԲՀԿ-ի:

-Չեմ կարծում, որ Հայաստանի քաղաքական ներկապնակում ինչ-որ մեկը տեղ ունի, որը ֆիքսված է և միշտ պետք է այդպես լինի: Քաղաքականությունը հնարավորինի արվեստ է, ամեն քաղաքական պրոցես իր հնարավորություններն է բերում: Այսօր մեզ համար կա հնարավորություն՝ լինելու 2-րդ ուժը և մենք այդ հնարավորությունն օգտագործելու ենք լավագույնս:

-Իսկ ի՞նչ կուսակցության հետ եք պատրաստում ընդլայնել դաշինքը:

-Անհատներ կլինեն, քաղաքական, հասարակական դեմքեր, ՀԿ-ների, փոքր ու միջին բիզնեսի, մեդիա սեկտորի ներկայացուցիչներ, մարդիկ՝ ԳԱԱ-ից, Հայաստան վերադարձածներ կլինեն:

-Որքան հասկացա՝ 2-րդ ուժ ասելով՝ բացառվում է ՔՊ-ի հետ միանալը:

- Իմաստը այս պահին չկա, նման քննարկում չկա և Երևանի ընտրությունն էլ ցույց տվեց, որ այդ կուսակցությունը կարող է միայնակ մասնակցել և միայնակ հասնել այն արդյունքներին, որոնց հասան: Դրա համար կարիք չկա, որ մենք միասնական մանակցություն ունենանք: Եվ կարծում եմ՝ հենց պետությանն է անհրաժեշտ, որպեսզի մասնակցությունը լինի այն տեսքով, ինչպես մենք ենք պատկերացնում՝ 2-րդ ուժի նպատակադրումով:

-Ի դեպ, քաղաքագետ Աղասի Ենոքյանը ինչ-ինչ սցենարների մասին էր գրել՝ նշելով, որ դեկտեմբերին ԱԺ-ի լուծարման դեպքում Նիկոլ Փաշինյանն ընդդիմություն կնշանակի իր «Լուսավոր Հայաստանին» ու «Հանրապետությանը»: Նաև ուզում եմ հիշեցնել, որ հենց օրենքով՝ ԱԺ-ի 1/3-ը պետք է լինի ընդդիմություն:

-Սա նոր Հայաստանն է, և կարծում եմ՝ պետք չի հին իրողություններով առաջնորդվել: Ընդդիմություն նշանակելը հին Հայաստանի իրողություն է, որն այսօր գոյություն չունի: Չկա այլևս նման մտածողություն: Չեմ կարծում, որ նոր Հայաստանում որևէ մեկին որևէ բան են նշանակում: ՀՀ քաղաքացիները կորոշեն, թե ով որ տեղում կլինի: Ես իմ ուսումնասիրություններով, իմ պատկերացումներով հասկանում եմ, որ ՀՀ քաղաքացիները մեզ տեսնում են որպես երկրորդ ուժ: