Եղանակն՝ այսօր
Ամերիկացիները ստեղծել են սմարթֆոնի հրամանով գույնն ու նախշը փոխող կտոր (տեսանյութ)
Ամերիկացի գիտնականները ստեղծել են այնպիսի գործվածք, որը կարող է սմարթֆոնի հավելվածի միջոցով տրված հրամանով փոխել գույնն ու վրայի նախշը կամ պատկերը:
Ինչպես նշում է CNBC-ն, ուշագրավ գյուտի հեղինակները Կենտրոնական Ֆլորիդայի համալսարանին կից Օպտիկայի և ֆոտոէլեկտրոնիկայի քոլեջի հետազոտողներն են:
Նրանք նոր գործվածքն օգտագործել են կանանց համար պայուսակներ ու ուսապարկեր կարելու համար: Հատկանշական է, որ սմարթֆոնում ներբեռնված հավելվածը թույլ է տալիս փոխել այդ ապրանքների գույնն ու վրայի պատկերը:
Մասնագետների փոխանցմամբ՝ դա հնարավոր է լինում գործվածքի թելերում ներդրված գերբարակ մետաղական լարերի շնորհիվ: Ոչ մեծ մարտկոցը հոսանքը փոխանցում է լարերին, որոնք էլ դրանից տաքանում ու փոխում են գործվածքում առկա հատուկ պիգմենտ-ներկանյութերի գույնը:
Հայտնի է, որ ներկայում մասնագետները փորձում են այնպես կատարելագործել իրենց գյուտը, որպեսզի նորարարությունը հնարավոր լինի կիրառել ավելի բարակ գործվածքներում:
Նշվում է, որ նման գործվածքներն առավել կիրառելի կլինեն ռազմական ոլորտում:
Տեսանյութը կարող եք դիտել այստեղ:
Studio One