Գիտնականները պարզել են մեքսիկական Լուսնի բուրգի տակ գտնվող գաղտնի թունելների առեղծվածն ու նշանակությունը

Գիտնականները ցնցող բացահայտումներ են կատարել Մեխիկոյից հյուսիս–արևելք ընկած Տեոտիուական հնագիտական վայրում:

Ինչպես ներկայացնում է Daily Mail-ը, հնագետները գաղտնի թունելներ են հայտնաբերել մեքսիկական ամենահայտնի Լուսնի բուրգի տակ, որոնք համարվում են «անցուղի դեպի այն աշխարհ», որտեղ փորձագետների կանխատեսմամբ՝ բազմաթիվ կմախքներ, գանգեր և այլ անհասկանալի իրեր կարելի է հայտնաբերել:

Լուսնի բուրգը մեծությամբ երկրորդն է Մեքսիկայում Արևի բուրգից հետո և թվագրվում է մ.թ.ա. 200 թվականին: Այս տեղանքում պեղումներն սկսվել էին 2017-ի հունիսին:

Տեոտիուական քաղաքը, ըստ գիտնականների, կառուցել են ացտեկներից առաջ այնտեղ բնակվող ցեղերը: Ենթադրվում է, որ ստորգետնյա թունելները նախատեսված են եղել այն աշխարհում հայտնված մարդկանց հետ կապ հաստատելու համար:

Ստորգետնյա թունելներում, մասնագետների ենթադրմամբ, տարիներ շարունակ զոհաբերություններ և այլ ծեսեր են անցկացվել: