Google-ը Կալիֆոռնիայում 1 մլրդ դոլար արժողությամբ գրասենյակային համալիր է ձեռք բերել

Ամերիկյան Google ընկերությունը Կալիֆոռնիա նահանգի Մաունթին Վյու քաղաքում գտնվող իր գլխամասային գրասենյակից ոչ հեռու 1 մլրդ դոլարով գրասենյակային շենքերի համալիր է ձեռք է բերել: Այս մասին հայտնում է San Francisco chronicle թերթը:

Թերթը գրում է, որ դա Սան Ֆրանցիսկոյում և հարակից քաղաքներում անշարժ գույքի ոլորտում ընթացիկ տարվա ամենախոշոր գնումն է: Խոսքը 12 գրասենյակային շենքի մասին է, որոնցում կարելի է տեղավորել 5 հազար աշխատակից: Նախկինում համալիրը պատկանել է LinkedIn սոցիալական ցանցին:

Այս ամիս The Wall Street Journal-ը գրել էր, որ Google-ը ծրագրում է ընդլայնել Նյու Յորքում իր ներկայացուցչությունը: Նշվում էր, որ ընկերությունը մտադիր է 12 հազար նոր աշխատակից տեղավորող գրասենյակային շենքեր ձեռք բերել, ինչը թույլ կտա կրկնապատկել ընկերության նյույորքյան աշխատակազմը: