ՀՀ օրհներգի փոփոխության հարցը պետք է լուծվի, «Մեր հայրենիքը» նվնվացող մեղեդի է, Խաչատրյանի օրհներգն առաջին իսկ նոտաներից վերելք է. Ա. Սաթյան (տեսանյութ)

Եթե Կոմպոզիտորների միությանը հարցնեն, Կոմպոզիտորների միությունը կողմ է, որ օրհներգը փոխվի, բայց ՀՀ օրհներգի փոփոխության հարցին անհրաժեշտ է քաղաքական լուծում. Tert.am-ի հետ զրույցում նման տեսակետ հայտնեց Կոմպոզիտորների միության նախագահ Արամ Սաթյանը:

Ըստ նրա՝ «Մեր հայրենիքը» նվնվացող մեղեդի է, իսկ Արամ Խաչատրյանի օրհներգը՝ առաջին իսկ նոտաներից վերելք է:

«Կոմպոզիտորների միության մեծամասնությունը կողմ է, որ օրհներգը փոխվի, նորից վերականգնվի, կամ ստեղծվի այն օրհներգը, որը կարող է ներկայացնել հայ ազգը ոչ թե նվնվացող, այլ պահանջող, հայ ազգը փոքր լինելով, մեծ ազգ է»,-ասաց նա:

Հիշեցնենք, որ ԱԺ փոխնախագահ Ալեն Սիմոնյանն առաջարկում է հանրային քննարկման հարց դարձնել ՀՀ օրհներգը փոխելու և Արամ Խաչատրյանի գրած օրհներգին վերադառնալու հարցը:

Ըստ Արամ Սաթյանի՝ այդ հարցը բազմիցս է բարձրաձայնվել, և քաղաքական լուծում չունենալու պատճառով դուրս եկել օրակարգից: Ըստ նրա՝ ՀՀ օրհներգը պատմական իրադարձություններում օգտագործվել է որպես այլ երկրի քաղաքացու երաժշտություն, բացի այդ, Գլազունովի «Ռայմոնդ» բալետի երկրորդ գործողությունը սկսվում է այդ երաժշտությամբ:

Արամ Սաթյանը պատահական չի համարում, որ այդ օրհներգի փոփոխության հարցի քննարկումն այսպես պարբերաբար բարձրաձայնվում է: Նա հիշեցրեց, որ 2006թ. եղավ նույնիսկ նոր օրհներգի մրցույթ, բայց ընտրությունը կանգ առավ Արամ Խաչատրյանի հեղինակած ՀԽՍՀ օրհներգի վրա:

«Արամ Խաչատրյանի օրհներգի հիմքում ընկած է շարական, որի վրա գրվել են խոսքեր և բնական է, որ  մշակվել է: Ժամանակին Խաչատրյանի օրհներգի ընտրության ժամանակ էլ է եղել մրցույթ, եղել են լավ տարբերակներ, բայց նրա օրհներգնի ընտրությունն էլ է եղել քաղաքական որոշում: Ինչո՞ւ էր Խաչատրյանը պետք, որովհետև նա այն դեմքն էր, որ ներկայացնում էր Հայաստանը աշխարհին»,-ասաց նա:

Կոմպոզիտորների միության նախագահը նշում է, որ մեր մեծ արվեստագետները՝ Առնո Բաբաջանյանը, Էդվարդ Միրզոյանը, նաև Կոնստանտին Օրբելյանը, կողմ էին Արամ Խաչատրյանի օրհներգի վերականգնմանը:

«Մեր մեծ արվեստագետները շատ լավ էլ հասկանում էին, որ օրհներգից կախված է շատ բան՝ և´ մեր երկրի վերածնունդը, և´ մեր երկրի բարի համբավը, և´ շատ բան»,-ասաց նա:

Իսկ թե ինչու է հարցը մշտապես մտնում փակուղի, ըստ Արամ Սաթյանի՝ քաղաքական լուծման բացակայության պատճառով: «Պետք է այդ հարցը լուծել, հերիք եղավ, բոլ եղավ գնանք ինչ-որ կուսակցական խաղերի մեջ մտնենք, բոլորս հայ ենք ու բոլորս մեկ կուսակցություն ենք, և դա հայ լինելն է»,-ասաց նա և նշեց, որ հիմնականում ՀՅԴ-ն է այդ հարցին դեմ հանդես գալիս, որովհետև դա իրենց օրհներգն էր, դրանով են եկել իշխանության և Հայաստանի Հանրապետություն հիմնել: