Ադրբեջանում դատապարտված Կարեն Ղազարյանի գործով ՄԻԵԴ-ում, բացի հիմնական գանգատից, կներկայացվի նաև նոր փաթեթ, որը վերաբերում է նրա դատավարությանը. Արա Ղազարյան

Ադրբեջանական դատարանի կողմից դատապարտված Կարեն Ղազարյանի գործը ներկայացվել է ՄԻԵԴ, որի շրջանակում, բացի հիմնական գանգատից, կներկայացվի նաև նոր փաթեթ, որը վերաբերում է նրա դատավարությանը. այսօր հրավիրված ասուլիսին տեղեկացրեց միջազգային իրավունքի մասնագետ, իրավաբան Արա Ղազարյանը:

Նա հիշեցրեց, որ հայկական կողմը հուլիսի 16-ից սկսել է վարույթը, և մեկ օրում ՄԻԵԴ-ը կայացրել է որոշում՝ ծանուցելու առաջադրված 4 հարցից երեքը, նախ տեղեկացնել Կարեն Ղազարյանի գտնվելու վայրի մասին, քանի որ օրեր շարունակ նրա գտնվելու վայրը ոչ ոք չգիտեր, տեղեկացնել առողջական վիճակի մասին, եթե գործ է հարուցվել, տրամադրել քրեական գործի մանրամասները: «Պահանջներից երեքը բավարարվել են, չորրորդը՝ մերժվել, դա  նրա վերադարձի պահանջն էր, որը կոնվենցիայի շրջանակից դուրս է»,-ասաց նա: 

Դրանից հետո փաստաբանն ասաց, որ ներկայացրել են հիմնական գանգատը, պատրաստվում են նոր փաթեթը լայնորեն լուսաբանված դատավարության վերաբերյալ:

«Մենք հիմնականում նշելու ենք, որ այն մտահոգությունները, որ ունեինք հուլիսի 16-ին, որ անձը, ով գտնվում է կալանքի տակ՝ առանց արտաքին աշխարհի հետ կապի, խախտվել է ոչ միայն նրա ազատության իրավունքը, այլ նաև դատաքննության իրավունքը»,-ասաց նա:

Ըստ իրավաբանի՝ դատավարությունը սկսվել է, բայց Կարենին շարունակում են պահել բացարձակապես անհաղորդակից արտաքին աշխարհի հետ, այդ թվում նաև՝ ծնողների հետ, ովքեր  դիմել են, ինչը նորմալ չէ: «Եթե նախաքննական շրջանում նախաքննական գաղտնիք ասվածը սահմանափակում է, այն էլ խիստ սահմանափակ ժամանակահատվածով, ապա անհասկանալի է, թե ինչու դատաքննության ընթացքում պետք է արգելվի, բնականաբար պատճառն այլ է, դիմումատուները կարծում են, որ պատճառն այն է, որ Կարենի նկատմամբ ստեղծվել է լեգենդ, կեղծ քրեական գործ և եթե Կարենին թույլ տան շփվելու ծնողների կամ արտաքին աշխարհի հետ, ապա այդ լեգենդը կփլվի»,-ասաց նա:

Ղազարյանը նշեց, որ միայն «Կարմիր խաչն» է, որ միջնորդավորված կապ է հաստատում նրա հետ, բայց գոյություն ունի կանխավարկած, որ այն, ինչ ասում է անձը, դրան վերապահումով պետք է մոտենալ: Նա նշեց, որ տեսապատկերից երևում էր, թե ինչքան է նիհարել, փաստաբանը նույնիսկ նրա կողքին նստած չէր, և դատաքննությունը նրա նկատմամբ արդար չէր կարող լինել:

Արա Ղազարյանը նշեց, որ գործին հենց սկզբից տրվել է առաջնահերթություն, ինչը նշանակում է, որ ավելի արագ է քննվելու, քան մնացած սովորական ընթացքով գործերը: «Մինչև այժմ մենք  4 անգամ փոխանակվել ենք փաթեթներով, չեմ հիշում այլ գործ, որ կես տարվա ընթացքում անընդհատ կոմունիկացիա լինի, ուստի մեզ համար կարող է դանդաղ թվալ, բայց ՄԻԵԴ-ի համար համեմատական կարգով արագ է գնում»,-ասաց նա:

Նա նշեց, որ իհարկե դա ծնողներին չի կարող բավարարել, և նրանք իրենց որդու ձայնն են ուզում լսել, և իրենք ևս մեկ դիմում են ուղարկել՝ խնդրելով դատարանին միջամտել, որ ապահովի գոնե կապը ծնողների և Կարենի միջև՝ ցանկացած ձևով՝ «սկայպով», հեռախոսով, կամ նույնիսկ թույլ տան հայրը  մտնի Ադրբեջան: «Իհարկե, ես քիչ հույսեր ունեի, որ ՄԻԵԴ-ը դա կհաստատի, հասկանալով ՄԻԵԴ-ի մանդատը, բայց ՄԻԵԴ-ից այդուհանդերձ ստացել են պատասխան, որ դա իրենց մանդատից դուրս է, իրավասությունից դուրս է նման հարցին միջամտելը: Ցավոք մերժվեց, ունենք այն, ինչ ունենք»,-ասաց նա և նշեց, որ ծնողները միջնորդավորված «Կարմիր խաչից» կցկտուր տեղեկություն են ստանում, որ Կարենը լավ է զգում իրեն, բայց ինչպես հավատալ այդ ինֆորմացիային:

Ի դեպ, Արա Ղազարյանը նշեց, որ հնարավոր չէ Ադրբեջանի փաստաբանին զանգել, քանի որ  կոմունիկացիաները թույլ չեն տալիս, թեև մեկ այլ գործով Ադրբեջանը պաթետիկ ասել է, որ ցանկացած  հարցի դեպքում ՀՀ-ից կարող են էլեկտրոնային տարբերակով դիմել գլխավոր կայք, բայց ՀՀ-ից ցանկացած օգտատեր, եթե փորձի պետական մարմին նամակ ուղարկել կամ մուտք գործել, դա հնարավոր չէ:

«Թեև մենք գլխավոր դատախազին դիմել ենք նամակով, ԱՄՆ-ի միջոցով ենք ուղարկել, բայց կրկին որևէ պատասխան չկա»,-ասաց նա և նշեց, որ այլ գործերով ևս կոմունիկացիա են խնդրել, համագործակցել, բայց չեն պատասխանում: