«Սպայկայի» տնօրենը կմնա կալանքի տակ. «Սա գնահատում ենք որպես գործարարից գումար կորզելու մեխանիզմ». պաշտպան

Այսօր վերաքննիչ դատարանը  հրապարակեց «Սպայկա» ընկերության տնօրենի կալանքի հարցով որոշումը, որով Դավիթ Ղազարյանը կմնա կալանքի տակ: Այս մասին լրագրողների հետ զրույցում հայտնեց նրա պաշտպան Արսեն Սարդարյանը: 

«Մեր բողոքը մերժվեց: Նման որոշման չէինք սպասում: Հնարավոր է, որ մեր վստահորդի հետ խոսելուց հետո մոտ օրերս հանդես գանք ասուլիսով: Այս որոշումը գնահատում ենք որպես գործարարից գումար կորզելու մեխանիզմ»,- ասաց նա:

Հիշեցնենք, որ Դավիթ Ղազարյանին մեղադրանք է առաջադրվել  ՀՀ քրեական օրենսգրքի 205-րդ հոդվածի 2-րդ մասով՝ ավելի քան 7 մլրդ դրամի մաքսատուրք և հարկ վճարելուց խուսափելու հատկանիշներով:

ՊԵԿ քննչական վարչության քննիչի կողմից ապրիլի 4-ին միջնորդություն էր ներկայացվել Երևան քաղաքի ընդհանուր իրավասության առաջին ատյանի դատարան` Դավիթ Ղազարյանի նկատմամբ կալանավորումը որպես խափանման միջոց ընտրելու համար: 

Դավիթ Ղազարյանը հանդես էր եկել մամուլի ասուլիսով՝ նշելով, որ ՊԵԿ-ը 7 մլրդ դրամի պահանջն ուռճացրել է, որպեսզի «ժողովրդի համար սիրուն լինի, և ժողովուրդը ՊԵԿ-ի կողքին լինի»: 

Նա նշել էր, որ ներկայացրած 7 մլրդ դրամի պահանջը շինծու է, և դա գնահատում է որպես ՊԵԿ-ի կողմից հետապնդում «Սպայկա»–ի նկատմամբ: Երևանի ընդհանուր իրավասության դատարանը բավարարել էր Պետական եկամուտների կոմիտեի միջնորդությունը՝ «Սպայկա» ընկերության տնօրեն Դավիթ Ղազարյանի նկատմամբ խափանման միջոց ընտրելով կալանավորումը: Պաշտպանական թիմը բողոքարկել էր առաջին ատյանի դատարանի որոշումը:

Ըստ պաշտպանի՝ ստացվում է, որ կա հաշվարկված ենթադրյալ չվճարված հարկ և այդ հաշվարկը կազմվել է և ուղարկվել է փորձագետներին, փորձագետներն էլ ասել են՝ ճիշտ է, թե ոչ: «Այս գործընթացին պաշտպանական թիմն ընդգրկված չի եղել, մեր աուդիտոր հաշվապահները չեն ընդգրկվել, որպեսզի հասկանանք պետությանը պատճառված վնաս առկա՞ է, թե՞ առկա չէ և եթե առկա է, ապա որքան է կազմում»,- ասաց Արսեն Սարդարյանը:

Նա նշեց, որ Դավիթ Ղազարյանը բազմիցս հայտարարել է, որ եթե այդ հաշվարկներին իրենց մասնագետների կողմից մասնակցելու որոշում լինի և հիմնավորված լինի, ապա այդ հարկը անպայման կվճարվի: 

«Այս պայմաններում ասվում է, որ Դավիթ Ղազարյանի ազատության մեջ մնալու դեպքում, նա կխոչընդոտի քննությանը: Ստացվում է՝ մեր պահանջը, որ պետք է փորձաքննությանը ներկա լինենք և պետք է այդ փորձաքննությանը մեր փաստարկները ներկայացնենք, ներկայացվում է որպես քննությանը խոչընդոտելու ռիսկ»,- ասաց նա:

Արսեն Սարդարյանի խոսքով՝ տպավորություն է, որ «Սպայկայի» և Դավիթ Ղազարյանի՝ իրենց իրավունքներից օգտվելը դիտվում է որպես կալանքի հիմք: «Այսինքն, ասում են՝ քանի որ դու այս պահին առանց փորձաքննության տվյալները ստուգելու, առանց փորձագետներին ներգրավվելու անվերապահորեն չես ընդունում այդ փորձաքննության արդյունքները, ուրեմն պետք է նստես»,- ասաց պաշտպանը և նշեց, որ վերաքննիչը նաև գրավի միջնորդությունն է մերժել։