«Ոչ մի դրական և լուրջ պատասխան չստացանք»․ անհետ կորած զինծառայողների հարազատները հանդիպեցին պաշտպանության նախարար Վաղարշակ Հարությունյանի հետ (տեսանյութ)
17։23
Լրագրողների հետ զրույցում ծնողներից մեկը հայտնեց. «Վաղարշակ Հարությունյանի հետ երկար զրույց ունեցանք, մեր հարցերը, դժգոհությունները հայտնեցինք: Հինգ ծնողով բոլոր հարցերը չէինք կարող տալ, ներսից էլ հայտնեցին, որ ծնողները ցուցակագրվեն, մինչև հինգշաբթի, ուրբաթ խոստացել են, որ նորից կհանդիպեն ծնողների հետ: Առաջին հերթին խոսել ենք գերիների հարցի մասին, հետո, թե ինչ գործողություններ են իրականացվում, որ մենք վերջնակետին հասնենք»:
Ծնողը փոխանցեց, որ Վաղարշակ Հարությունյանը տարբեր երկրների դեսպանների հետ է հանդիպում, որպեսզի որոշ ճնշումների արդյունքում գերիների վերադարձ իրականացվի: Իսկ անհետ կորածների մասով Հարությունյանը վստահեցրել է, որ համապատասխան քայլեր են իրականացվում: «Որևէ խնդրի դրական լուծում չեղավ: Լիարժեք պատասխան չստացանք այս հանդիպումից, մենք ուզում ենք տեսնել, այլ ոչ թե լսել»:
Ծնողը ներկայացրեց նաև, որ իրենց ներկայությամբ Վաղարշակ Հարությունյանի կողմից Ռազմական ոստիկանության պետը հրաման ստացավ, որ անհապաղ սպաներին հավաքեն և օգնեն ծնողներին:
16։09
Այսօր անհետ կորած զինծառայողների ծնողները կրկին ՊՆ-ի դիմաց են: Նրանց մի մասը հանդիպում ունեցավ ՊՆ-ում:
Նշենք, որ անցած շաբաթ վերջիններս կրկին ՊՆ-ի դիմաց պահանջում էին Վաղարշակ Հարությունյանի հետ հանդիպում, սակայն այն տեղի չունեցավ:
Անհետ կորած զինծառայողների ծնողները տևական ժամանակ է՝ ակցիաներ են անում՝ պահանջելով օր առաջ զբաղվել իրենց երեխաներին գտնելու ուղղությամբ որոնողական աշխատանքներ իրականացնելու համար: Սակայն նրանք նշում են, որ որևէ հանդիպում արդյունք չի տվել, Կառավարությունը ոչինչ չի կարողանում անել: Նրանք նամակներ և դիմումներ են նաև ներկայացրել ՌԴ դեսպանատուն:










