Լկտիագույն սուտ է՝ իշխանությունը գերիների հարցով զբաղվում է միայն «գալչկայի» համար, ընդդիմությո՛ւն, ձեզ վրա հույս դնել չի լինի, դրա համար մեզ ասում են՝ արտահերթ ընտրություններ մի արեք. պատգամավոր
Հարգելի՛ գործընկերներ, ես հասկանում եմ, որ ով ինչ ուզի այս ամբիոնից կարող է խոսել, բայց այս ինչե՞ր եք ձեզ թույլ տալիս ընդհանրապես, ի՞նչ է նշանակում՝ իշխանությունը գերիների հարցով զբաղվում է «գալչկայի» համար, ուրեմն ես պաշտոնապես հայտարարում եմ՝ դա լկտի, սուտ է, լկտիագույն սուտ: Այս մասին ԱԺ հայտարարությունների ժամին իր ելույթում նշեց «Իմ քայլը» խմբակցության պատգամավոր Վաղարշակ Հակոբյանը:
«Ինչպե՞ս կարելի է նման արտահայտություն անել՝ սիրես էդ մարդուն, չսիրես էդ մարդուն, սիրես էդ ղեկավարին կամ իշխանության նեկայացուցչին, կամ չէ, գաս ասես՝ իշխանությունը գերիների հարցով զբաղվում է գալչկայի համա՞ր: Չեմ հասկանում՝ էս ո՞ւր ենք մենք հասել, 2 ամսից ավելի մենք լռում ենք, չենք ուզում այս պրոցեսը տանենք լարվածության, բայց էս ինչի՞ մասին է ընդհանրապես խոսքը, ո՞վ է ձեզ իրավունք տվել նման բան ասել: Լսե՞լ եք որևէ իշխանության ներկայացուցչի կողմից անհարգալից վերաբերմունք ձեզնից որևէ մեկի անձի հանդեպ»,- հայտարարեց նա:
Վաղարշակ Հակոբյանը այնուհետև անդրադարձավ ԲՀԿ-ական պատգամավոր Միքայել Մելքումյանի հայտարարությանը. «Մեր հարգելի գործընկեր Միքայել Մելքումյանն ասում է՝ ձեզ վրա հույս դնել չի լինի: Հարգելի՛ գործըկերներ, ընդդիմության ներկայացուցիչներ, ձեզ վրա հույս դնել չի լինի, էս ժողովուրդը դա շատ լավ գիտի, դրա համար էլ 70 տոկոս մեզ ձայն է տվել, դրա համար էլ հիմա ասում է՝ մի գնացեք արտահերթ ընտրությունների, որովհետև այդ ընդդիմության վրա հույս դնել չի լինելու»,- ասաց նա:










