Հրաժարական չեմ տալիս, խոստումներ եմ տվել, որոնք պետք է հերթով կատարեմ. Հայկ Մարության (տեսանյութ)
Հրաժարական չեմ տալիս. այս մասին ավագանու նիստին հայտարարեց Երևանի քաղաքապետ Հայկ Մարությանը՝ անդրադառնալով ավագանու «Բարգավաճ Հայաստան» խմբակցության անդամ Մարկոս Հարությունյանի հարցին՝ մամուլում շրջանառվում են ձեր հրաժարականի մասին լուրեր և նշվում է, որ նշանակվելու եք Չեխիայի դեսպան, որքանո՞վ են հավաստի այդ լուրերը:
«Եթե, այնուամենայնիվ, որոշեք հրաժարական տալ, գտեք մեխանիզմներ, որ այս ավագանին ցրվի, որովհետև այս ավագանիում չկա մի ավագանու անդամ, ով կարող է Երևանի քաղաքապետ աշխատել»,- ասաց Մարկոս Հարությունյանը:
Քաղաքապետը նախ նշեց, որ հրաժարական չի տալու, ապա ավելացրեց, որ մինչև Չեխիայի դեսպանը նշում էին, թե ԱՄՆ դեսպան է նշանակվելու:
«Այսինքն՝ տարբեր, հիմա նախապատրաստվում էի արդեն Ճապոնիայում ՀՀ դեսպանը լինել, քիչ-քիչ: Բայց ամենահետաքրիրը դա չէ, ամենահետաքրքիրը այդ դեսպանների վիճակն է, որոնք թերթերից կարդում են դա: Թե չէ մենք այստեղ ենք, մենք գիտենք, որ ոչ մի բան չկա, մեզ համար հանգիստ աշխատում ենք, բա այդ դեսպաններն ի՞նչ ասեն»,- կատակեց քաղաքապետը:
Նա նշեց, որ ունի տրված խոստումներ ժողովրդին և այդ խոստումները հերթականությամբ կատարելով գնում է, քանի դեռ բոլոր խոստումները կատարված չեն, անում է իր աշխատանքը:
ԱՆի Խաչատրյան էլ արձագանքեց. «Պարոն քաղաքապետ, բա որ մինչև ժամկետի վերջը չկատարեք Ձեր խոստումները, էլի պիտի մնա՞ք»: Քաղաքպետը պատասխանեց․ «Բա տեսնո՞ւմ եք»։ Ի պատասխան Անի Խաչատրյանն ասաց. «Քաշվանք էլի»:
Մարությանն էլ կատակեց՝ դե ուրեմն օգնեք, որ կատարեմ խոստումներս:










