Գերիների խնդրի մասին ինձ հիշեցնելու կարիք չկա, խնդրի հետ կապված որևէ ակցիա անելու կարիք էլ չկա, այդ ակցիաները մեր գլխում, մեր մտքում և մեր սրտում են. Նիկոլ Փաշինյան (տեսանյութ)

18:22 • 10.02.21

Գերիների վերադարձի հետ կապված դժգոհություն կա ոչ միայն Շիրակի մարզում, դժգոհություն կա կառավարությունում, բոլորս էլ դժգոհ ենք, այսօր այդ իրավիճակից որևէ մեկն էլ գոհ չէ: Այս մասին ԱԺ-ում Կառավարության հետ հարցուպատասխանի ժամանակ ասաց Նիկոլ Փաշինյանը՝ անդրադառնալով «Իմ քայլը» խմբակցության պատգամավոր Նազելի Բաղդասարյանի գերիների մասին հարցին:

«Փաստենք, որ այս պահին Շիրակի մարզում դժգոհության ալիք կա գերիների վերադարձի հետ կապված, միջպետական ճանապարհ է փակվել, և ծնողները ցանկություն ունեն հանդիպելու Ձեզ հետ»,- ասաց պատգամավորը:

Փաշինյանը նշեց, որ պլանավորում են այց Շիրակի մարզ, որտեղ տարբեր հանդիպումներ կունենան քաղաքացիների հետ, այդ թվում նաև գերիների հարազատների հետ:

«Ուզում եմ հավաստիացում անել՝ գերիների խնդրի մասին մեզ, ինձ, հիշեցնելու անհրաժեշտություն չկա, որովհետև մենք ոչ մի վայրկյան այդ խնդրի մասին չենք մոռանում: Այդ խնդրի հետ կապված մեզ որևէ գործողության դրդելու համար որևէ ակցիա անելու անհրաժեշտություն չկա, որովհետև այդ ակցիաները մեր գլխում, մեր մտքում, մեր սրտում են: Սա այն դեպքն է, երբ մենք պետք է առաջնորդվենք բժշկական սկզբունքով՝ չվնասել»,- ասաց նա:

Փաշինյանի խոսքով՝ այս ընթացքում էլ համոզվել են, որ եղել են մի շարք գործողություններ, որոնք թվացել է, որ տեղի են ունենում ի նպաստ խնդրի շուտափույթ լուծման, բայց գործնականում հակառական է տեղի ունեցել:

«Բնականաբար առաջնահերթություն է գերիների հարցը: Բազմաթիվ այլ միջոցներով էլ ակտիվ աշխատանք է տեղի ունենում դրա հետ կապված և նաև ուզում եմ ընդգծել ՌԴ մեր գործընկերներն ակտիվ ներգրավված են գործընթացում»,- ասաց նա:

Մանրամասները՝ տեսանյութում: