Զինադադարի խախտումներ եղել են, ասենք թե՝ օրական 5 փամփուշտ են կրակում օդ, ես այդ հարցը դրել եմ խաղաղապահ ուժերի հրամանատարի առաջ, նա էլ՝ Ալիևի. Վաղարշակ Հարությունյան (տեսանյութ)
Ինձ են դիմել մի շարք քաղաքացիներ և կազմակերպություններ, որոնց գույքը օգտագործվել է պատերազմի ժամանակ, իսկ հիմա կամ վնասված է, կամ գոյություն չունի: Այս մասին Ազգային ժողովում կառավարության հետ հարցուպատասխանի ժամանակ, դիմելով պաշտպանության նախարար Վաղարշակ Հարությունյանին, ասաց ԱԺ պատգամավոր Թագուհի Թովմասյանը:
ՀՀ պաշտպանության նախարար Վաղարշակ Հարությունյանը պատասխանելով հարցին՝ ասաց, որ այդ հարցը ուսումնասիրում են, դա հաշվառված է, օրենքով նախատեսված է և ստանում են համապատասխան տվյալներ, որոնք ուսումնասիրելուց հետ որոշում կընդունվի և կամ փոխհատուցում կլինի, կամ ինչ-որ առաջարկում են:
Թագուհի Թովմասյանը հայտնեց նաև, որ քիչ առաջ ահազանգ ստացավ, որ Սյունիքի մարզի Սրաշեն և Շիկահող համայնքներից, որտեղ մարդիկ լսել են անկանոն կրակոցներ, ըստ ամենայնի՝ ադբեջանական կողմից: Նախարարը նշեց՝ այդ ահազանգի մասին տեղյակ չէ, բայց կճշտի:
«Իսկ ինչ վերաբերում է ընդհանուր իրավիճակին, ապա պաշտպանության նախարարությունը ամեն օր ներկայացնում է շփման գծում և Ղարաբաղում իրավիճակը: Դեկտեմբեր ամսից մինչ այսօր մենք չունենք որևէ մի սպանություն շփման գծում, մեկ վիրավոր ունենք Շուշիում: Այս ընթացքում որևէ մի միջադեպ, որը ֆիքսվել է մեր կողմից, չկա: Զինադադարի խախտումներ եղել են, ասենք թե՝ օրական հինգ փամփուշտ են կրակում, բայց ոչ ուղղված մեր դիրքերին, օդ են կրակում, բոլոր այդ դեպքերը ֆիքսում ենք և եթե Ղարաբաղի հատվածում է, փոխանցում ենք խաղաղապահ ուժերին: Այսօր ես հանդիպել եմ խաղաղապահ ուժերի հրամանատար Մուրադովի հետ և հարցը եմ դրել, որ կան դեպքեր, որ ուղղված չեն մեր դիրքերին, բայց կան դեպքեր, երբ ուղղված են, ինքը նույն հարցը դրել է Իլհամ Ալիևի առաջ, որ կան այսպիսի դեպքեր, ոնց ենք դա գրանցում»,-ասաց Վաղարշակ Հարությունյանը:










